Bakı, 7 sentyabr, AZƏRTAC

Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının (ASK) tərkibində fəaliyyət göstərən “Turizm və xidmət üzrə iş” komissiyasının iclası keçirilib.

ASK-dan AZƏRTAC-a bildirilib ki, iclas turizm sənayesi nümayəndələrinin problemli kreditlərinin həlli yolları və dövlətin dəstək mexanizmləri, “Koronavirus (COVID-19) pandemiyası dövründə Azərbaycan Respublikasında mehmanxanaların fəaliyyətinin təşkili Qaydaları”nın təsdiq edilməsi barədə qərarın müzakirəsinə həsr olunub.

İclasda ASK-nın vitse-prezidenti, Azərbaycan Banklar Assosiasiyasının prezidenti Zakir Nuriyev, eləcə də vitse-prezidentlər Jalə Hacıyeva və Vüqar Zeynalov, Kiçik və Orta Biznesin İnkişafı Agentliyinin, Dövlət Turizm Agentliyinin nümayəndələri iştirak ediblər.

İclası “Turizm və xidmət üzrə iş” komissiyasının sədri Ruslan Quliyev açaraq sahibkarlardan daxil olan məktublar və sorğularla bağlı təkliflər hazırlanmasında bu müzakirələrin müsbət rolu olacağını bildirib. Turizm sektorundakı mövcud vəziyyət və pandemiya ilə əlaqədar qeyri-müəyyənliklərin davam etməsinə toxunan R.Quliyev dövlət-özəl dialoqu nəticəsində çətinliklərin öhdəsindən birgə gələcəyimizi vurğulayıb.

ASK-nın vitse-prezidenti Z.Nuriyev bildirib ki, pandemiyanın iqtisadiyyata təsirləri ilə bağlı mart ayından başlayaraq bir sıra qərarlar qəbul edilib və yaradılmış komissiyalardan biri də Azərbaycan Mərkəzi Bankının nəzdində fəaliyyət göstərir. Konfederasiyanın prezidenti Məmməd Musayev tərəfindən Azərbaycan Mərkəzi Bankına pandemiyadan zərərçəkən sahə olaraq turizm sektorundakı biznes sahələrinə yardımın göstərilməsi ilə əlaqədar müraciət edilib. Mərkəzi Bank bu məsələni müzakirə edərək İqtisadiyyat Nazirliyinə, Nazirlər Kabinetinə əlavə müraciətlər edilməsini tövsiyə edib. Eyni zamanda, sahibkarların bağlanmış banklarda qalmış aktivlərinin reallaşdırılması ilə bağlı Əmanətlərin Sığortalanması Fonduna müraciət edilərək banklarda vəsaiti qalmış təşkilatların həmin aktivlərinin çıxarılması yollarının onlarla müzakirə edilməsi tövsiyə olunub deyən Z.Nuriyev hazırda banklar tərəfindən mövcud kreditlərin sentyabrın 30-dək restrukturizasiya edildiyini vurğulayıb.

Konfederasiyanın vitse-prezidenti J.Hacıyeva banklardakı və bank olmayan kredit təşkilatlarındakı (BOKT) problemli kreditlərlə bağlı sahibkarların bankdakı kuratorları ilə məsləhətləşmələr aparmasını təklif edib.

Sonra sahibkarlar bir illik kredit tətillərinin verilməsi və digər dəstək mexanizmləri, o cümlədən “Koronavirus (COVID-19) pandemiyası dövründə Azərbaycanda mehmanxanaların fəaliyyətinin təşkili Qaydaları”na dəyişikliklərlə bağlı təkliflərini veriblər.

“DAİR” Otellər və Restoranlar Assosiasiyasının sədri Samir Dübəndi 15 müddəada (artıq 2 müddəa ləğv edilib) çətin tətbiq edilən qaydaların müəyyən olunduğunu deyərək bununla bağlı ekspertlərin iştirakı ilə yeni qaydaların hazırlanmasını xahiş edib.

Dövlət Turizm Agentliyinin nümayəndəsi Aytən Əlizamanlı “Sahman” proqramının turizm şirkətlərində tətbiqinə dair məlumat verərək qaydaların təkmilləşdirilməsinin mümkün olduğunu bildirib.

Görüşün sonunda ASK-nın vitse-prezidenti V.Zeynalov dövlət-özəl əməkdaşlığı platformasından istifadə edərək çətinliklərin həllinə birgə nail olunacağını vurğulayıb. Onun təklifi ilə sahibkarların banklardakı problemli kreditləri ilə bağlı statistikanı formalaşdırmaq qərara alınıb ki, bununla bağlı mövcud mənzərə tam formalaşdırılsın.

Komissiya sədri R.Quliyev iclasın iştirakçılarına təşəkkür edərək ASK-nın yeni təkliflər paketini formalaşdırmaqla hökumətə müraciət edəcəyini söyləyib.