Bakı, 2 iyul, AZƏRTAC

Azərbaycan Mərkəzi Bankının (AMB) baş direktorları Rəşad Orucov və Ziya Əliyevin iştirakı ilə təşkil olunmuş onlayn “B2G forum” çərçivəsində sahibkarların COVID-19 pandemiyası dövründə rastlaşdıqları məsələlər müzakirə edilib.

Bu barədə AZƏRTAC-a “Caspian European Club” və “Caspian Energy Group”un sədri və baş icraçı direktoru Telman Əliyev məlumat verib.

AMB və “Caspian European Club” arasındakı əməkdaşlığı qeyd edən R.Orucov keçirilən görüşlərin xüsusi əhəmiyyətini diqqətə çatdırıb və bunun ölkəmizdə dövlət ilə özəl sektor arasında dialoqun inkişafına müsbət töhfə verdiyini vurğulayıb. O, koronavirus pandemiyasının, dünya enerji və səhm bazarlarında baş verən kəskin dalğalanmaların iqtisadiyyata, makroiqtisadi sabitliyə, məşğulluğa və sahibkarlara mənfi təsirinin azaldılması ilə bağlı Prezident İlham Əliyevin 2020-ci il 19 mart tarixli Sərəncamının 10.2-ci bəndinin icrası ilə bağlı Nazirlər Kabineti tərəfindən təsdiq edilmiş Tədbirlər Planı ilə uzlaşdırılmaqla AMB tərəfindən qəbul edilmiş dəstəkləyici tədbirlər haqqında geniş məlumat verib.

“Azərbaycan Mərkəzi Bankı tərəfindən qəbul edilmiş requlyativ qərarlarla pandemiyadan zərərçəkmiş sahələrdə fəaliyyət göstərən sahibkarlar üçün kreditlərinin restrukturizasiya imkanları yaradılıb. İndiki dövrdə üzərinə böyük yük düşən və iqtisadiyyatın maliyyələşdirilməsində rolu əhəmiyyətli dərəcədə artan maliyyə sektoru təmsilçilərinin dayanıqlılığına və sağlamlığının qorunmasına yönəldilən bir sıra tədbirlər görülür", - deyə R.Orucov bildirib.

Z.Əliyev isə çıxışında dünyanın aparıcı mərkəzi banklarının gördüyü tədbirləri və iqtisadiyyata verdiyi monetar stimulların qlobal maliyyə böhranının qarşısını aldığını vurğulayıb. O deyib ki, Azərbaycan hökuməti malik olduğu valyuta ehtiyatları, makroiqtisadi idarəetmə çərçivəsi və makroiqtisadi idarəetmə orqanları arasında formalaşmış effektiv koordinasiya mühiti makroiqtisadi stabilliyi qoruyub saxlamağa imkan verir. Artıq valyuta bazarı sabitləşib və bu sahədə neqativ iqtisadi gözləntilər xeyli azalıb.

Sonra “Caspian European Club”un üzv şirkətlərinin rəhbər və nümayəndələrinin sualları cavablandırılıb və təklifləri dinlənilib.

T.Əliyev açıq dialoqa görə qonaqlara minnətdarlığını bildirib və “Caspian European Club”la birgə sahibkarların təkliflərini operativ şəkildə öyrənmək, onları Azərbaycan Mərkəzi Bankının rəhbərliyinə çatdıra biləcək ikitərəfli işçi qrup yaratmağı təklif edib.

Dövlət və özəl sektor arasında dialoqu fəallaşdırmaq üçün mühüm vasitə olan onlayn “B2G forum” Azərbaycan, Gürcüstan və Qazaxıstanda “Caspian European Club” tərəfindən hər həftə keçirilir. T.Əliyevin sözlərinə görə, sıralarında dünyanın 50 ölkəsindən 5 mindən çox şirkət və təşkilatı birləşdirən “Caspian European Club” 2002-ci ilin iyununda yaradılıb. “Biznes-hökumət” dialoqunun fəal iştirakçısı olan “Caspian European Club”un əsas məqsədi Azərbaycanda və “Caspian European Club”un fəaliyyət göstərdiyi digər ölkələrdə investisiya və işgüzar mühitin yaxşılaşdırılmasından, həmçinin “B2G”, “B2B” və “B2C” formatlarında dialoqların stimullaşdırılmasından və onlarda fəal iştirakdan ibarətdir.

Biznes-netvorkinq üçün beynəlxalq platforma olan “Caspian European Club” mütəmadi olaraq “CEO Brunch”, “CEO Lunch”, “Business tour” kimi müxtəlif tədbirlər təşkil edir. Onlayn biznes-treninqlər çərçivəsində yerli və xarici mütəxəssislərlə vebinarlar, treninq və seminarlar keçirilir. “Caspian European Club”un mənzil-qərargahı Bakıda yerləşir. “Caspian European Club”un Gürcüstan və Qazaxıstanda rəsmi nümayəndəlikləri, eyni zamanda, ABŞ, Almaniya, Polşa, Latviya və Çexiyada səlahiyyətli nümayəndələri var.