Roma, 4 iyun, AZƏRTAC

İtaliyanın nüfuzlu “Il Gironale” qəzetində Azərbaycanın İtaliyadakı səfiri Məmməd Əhmədzadənin iyunun 4-də Kəlbəcər rayonunda xidməti vəzifələrini yerinə yetirərkən ikisi jurnalist olmaqla, 3 azərbaycanlı mülki şəxsin - Azərbaycan Televiziyasının operatoru, 1989-cu il təvəllüdlü Sirac Abışovun, Azərbaycan Dövlət İnformasiya Agentliyinin (AZƏRTAC-ın) müxbiri, 1982-ci il təvəllüdlü Məhərrəm İbrahimovun və Susuzluq kənd inzibati ərazi dairəsi üzrə nümayəndəliyin rəsmisi Arif Əliyevin tank əleyhinə minaya düşərək həlak olması, hadisə zamanı daha dörd mülki şəxsin də yaralanması ilə bağlı “Beynəlxalq ictimaiyyət Ermənistanı dayandırmalıdır!” sərlövhəli məqaləsi dərc olunub.

AZƏRTAC xəbər verir ki, məqalədə Ermənistanın Azərbaycana qarşı müharibə cinayətlərinin davam etdiyini bildirən səfir baş vermiş hadisə haqqında danışıb. Diplomat xatırladıb ki, bir neçə gün əvvəl Azərbaycanın Xarici İşlər Nazirliyi rəsmi açıqlama verərək mayın 27-də Ermənistan silahlı qüvvələrinin iki qrupdan ibarət kəşfiyyat-diversiya dəstəsinin Ermənistan-Azərbaycan dövlət sərhədinin Kəlbəcər rayonunun Yuxarı Ayrım kəndi istiqamətində Azərbaycan ərazilərinin dərinliyinə daxil olaraq, ərazidə kəşfiyyat-diversiya əməliyyatları və yolların minalanmasına yönəlmiş təxribat terror fəaliyyəti həyata keçirməyə cəhd göstərdiklərini bildirib. Habelə Azərbaycan XİN-in müvafiq açıqlamasındakı fikirlərə istinad edərək vurğulayıb ki, Azərbaycan Ermənistanın illər ərzində basdırdığı minalardan əziyyət çəkdiyi halda, Ermənistanın diversant qrupu tərəfindən Azərbaycan ərazisində həyata keçirilən diversiya və keçid yollarını növbəti minalama cəhdləri hərbçilərimizin və gələcəkdə mülki insanların həyatı üçün ciddi təhlükədir.

“Azərbaycan tərəfinin xəbərdarlığına diqqət yetirməyənlər və Ermənistanın Azərbaycana qarşı dezinformasiyasına inanmaq istəyənlər bu gün baş verənlərdən nəticə çıxarmalıdırlar”, - deyə diplomat vurğulayıb.

M.Əhmədzadə əlavə edib ki, İkinci Qarabağ müharibəsinin bitməsindən sonra, yəni, 2020-ci il 10 noyabr tarixli üçtərəfli Bəyanatın imzalandığı gündən bəri Ermənistan tərəfindən yerləşdirilən müxtəlif növ minalar və digər partlayıcı qurğular nəticəsində 120-dən çox insan həlak olub və ya yaralanıb. Habelə bildirib ki, Bəyanat imzalandıqdan sonrakı müddət ərzində işğaldan azad edilmiş ərazilərimizdə təxminən 100 milyon kvadratmetr sahədə 35 mindən çox minanın zərərsizləşdirilməsinə baxmayaraq, mina qurbanlarının sayı artmaqda davam edir və minalanmış ərazilərin xəritələrinin verilməsi ilə bağlı dəfələrlə xəbərdarlıq edilməsinə baxmayaraq, Ermənistan məqsədyönlü şəkildə bundan imtina edir.

Səfir bildirib ki, iyunun 4-də Azərbaycan işğaldan azad edilmiş ərazilərdə insanların həyatı üçün təhlükə yaradan minaların yerlərinə dair Ermənistanın müvafiq xəritələri təqdim etməkdən imtinası ilə bağlı ikinci dəfə İnsan Hüquqları üzrə Avropa Məhkəməsinə (İHAM) dövlətlərarası şikayət göndərib. Birinci şikayət ərizəsi isə cari il yanvarın 16-da ünvanlanıb.

Diplomat 2021-ci ilin fevralında Azərbaycanın xarici işlər naziri Ceyhun Bayramovun Birləşmiş Millətlər Təşkilatının Baş katibinə müraciət edərək, Ermənistanın minalanmış ərazilər barədə məlumatları açıqlaması üçün edilən çağırışlara dəstək verilməsini xahiş etdiyini, habelə məsələ ilə bağlı ölkəmiz tərəfindən müxtəlif rəsmi şəxslər və ayrı-ayrı ekspertlər səviyyəsində çıxış və bəyanatların səsləndirildiyini də diqqətə çatdırıb.

Ermənistanın Azərbaycan ərazilərində məqsədli şəkildə və geniş miqyasda minalar basdırmasının beynəlxalq humanitar hüququn, o cümlədən 1949-cu il Cenevrə konvensiyalarının kobud şəkildə pozulması olduğunu deyən diplomat vurğulayıb ki, Ermənistanın Azərbaycanın insanların həyatını xilas etmək səylərinə kömək edə biləcək bu xəritələri və digər zəruri məlumatları təqdim etməkdən imtinası Azərbaycan əhalisinin İnsan Hüquqları üzrə Avropa Konvensiyasının 2-ci və 8-ci maddələrindən, 1 saylı Protokolunun 1-ci, 4 saylı Protokolunun 2 (1) və 3(2) maddələrindən irəli gələn hüquqlarının ciddi şəkildə pozulmasına səbəb olur.

M.Əhmədzadə, habelə əlavə edib ki, Ermənistanın minalanmış ərazilərin xəritəsini verməməsi, ilk növbədə, sülhə təhdiddir. Habelə bu davranış bütün beynəlxalq qanunlara, prinsiplərə zidd olmaqla yanaşı, hərbi cinayət hesab olunur, çünki Ermənistan tərəfi bununla həm də daha çox insanın həlak olması məqsədini güdür. Diplomat vurğulayıb ki, bununla Ermənistan torpaqlarımızı işğal edərkən zorla öz yurd-yuvalarından didərgin düşmüş məcburi köçkün ailələrinin 30 il sonra öz evlərinə qaytarılması səylərinə də mane olur, həm də işğaldan azad edilmiş ərazilərimizdəki bərpa və yenidənqurma işlərini ləngitməyə çalışır.

“Baş verənlər onu göstərir ki, Ermənistan sülhdə maraqlı deyil. Ən pisi isə odur ki, Ermənistana hələ də ciddi təzyiqlər göstərilmir. Dünyanın bu susqunluğa son verməsi üçün daha nə qədər günahsız azərbaycanlı mülki şəxslər həyatını itirməlidir? Azərbaycanın azad edilmiş ərazilərində 30 illik işğal vaxtı ermənilərin törətdiyi misli görünməmiş dağıntılara, hələ də öz torpaqlarına qayıda bilməyən 1 milyondan artıq azərbaycanlı qaçqın və məcburi köçkünlərin taleyinə və davamlı olaraq erməni minalarının qurbanı olan bu qədər məsum və günahsız azərbaycanlı mülki şəxslərin axıdılmış qanlarına nə zamana qədər biganə yanaşılacaq?”, deyə diplomat məqaləsini tamamlayıb.

Elgün Niftəli

AZƏRTAC-ın xüsusi müxbiri

Roma