“Signify” şirkətinin təklif etdiyi işıqlandırma sistemlərinin SOCAR-ın zavodlarında və müəssisələrində tətbiqinə dair müzakirələr aparılıb

Bakı, 26 may, AZƏRTAC

SOCAR-ın prezidenti Rövnəq Abdullayev “Signify” şirkətinin baş icraçı direktoru Erik Rondolat və şirkət rəhbərliyinin digər nümayəndələri ilə görüşüb.

Şirkətdən AZƏRTAC-a bildirilib ki, Azərbaycan Prezidenti İlham Əliyevlə Davos İqtisadi Forumunda görüşündən sonra iqtisadi və enerji dayanıqlığının Azərbaycan üçün əhəmiyyətini nəzərə alaraq, bu sahəyə aid texnologiyalarını təklif etmək üçün Bakıya səfər etdiyini bildirən E.Rondolat “Signify” şirkətinin yeni işıqlandırma texnologiyaları sahəsində ixtisaslaşdığını, şirkətin LED texnologiyasına əsaslanan işıqlandırma sistemlərinin daha dayanıqlı və qənaətli olduğunu, daha effektiv idarə olunduğunu vurğulayıb.

Görüşdə “Signify” şirkətinin təklif etdiyi işıqlandırma sistemlərinin SOCAR-ın emal zavodlarında və digər müəssisələrində tətbiqi imkanlarını araşdırmaq və səmərəliliyini müəyyən etmək üçün aidiyyəti sahələr üzrə məsul şəxslərlə danışıqların davam etdirilməsi təklif olunub.

Əvvəlki adı “Philips Lighting” olan “Signify” şirkəti şəhərlərin işıqlandırılması sahəsində dünyanın aparıcı şirkətlərindən sayılır. Şirkətin tətbiq etdiyi LED texnologiyası ilə elektrik enerjisinə qənaət etmək mümkündür. “Signify” artıq 20 ildir ki, həm də kənd təsərrüfatı məhsullarının işıqlandırma texnologiyaları ilə məşğuldur.