Salyan, 11 iyun, Mahir Babayev, AZƏRTAC

Regionların sosial-iqtisadi inkişafı Dövlət Proqramına uyğun olaraq sərnişin və yükdaşıma işlərinin daha da yaxşılaşdırılması məqsədilə Şirvan-Salyan yolunda əsaslı təmir işləri aparılır.

AZƏRTAC-ın bölgə müxbiri xəbər verir ki, 120 min əhalinin yaşadığı 20 yaşayış məntəqəsini birləşdirən yolun yenidən qurulmasına başlanılıb. Uzun illər əsaslı təmir olunmayan avtomobil yolunun torpaq, həmçinin örtük hissəsində çökmə və qabarmalar əmələ gəldiyindən nəqliyyat vasitələrinin hərəkətində problemlər yaranırdı.

Bu çətinliklərin aradan qaldırılması üçün cari ilin fevral ayında Azərbaycan Avtomobil Yolları Dövlət Agentliyi Prezidentin Sərəncamı ilə ayrılan vəsait hesabına yolun təmirinə başlayıb. Layihəyə uyğun olaraq, tikinti zamanı zəruri yerlərdə yol yatağının yararsız qruntu qazılaraq çıxarılır, əvəzinə karbonat materialı tökülərək kipləşdirilir. Yolboyu mövcud suötürücü borular yenisi ilə əvəz olunur, dəmir-beton borular quraşdırılır. Tikinti zamanı 4 ədəd suötürücü qurğunun quraşdırılması da nəzərdə tutulub və artıq qurğunun üçünün tikintisi başa çatdırılıb.

Sahə rəisi Nəcəf Cəlilov bildirib ki, ümumi uzunluğu 31 kilometr olan yolun eni 14 metr, asfaltın qalınlığı isə 20 santimetrdir. Artıq yolun 20 kilometr hissəsində işlər başa çatdırılıb. 10 kilometr hissə isə asfalt örtüyünün vurulması üçün hazırlanıb. Hazırda qalan 1 kilometr hissədə yol yatağı bərkidilir. Bu iş başa çatdıqdan sonra asfalt örtüyünün vurulmasına başlanılacaq.

Tikinti işləri çərçivəsində yolboyu dayanacaqların qoyulması da nəzərdə tutulub. Hərəkətin normal təşkili üçün 362 ədəd yol nişanı, məlumatverici lövhə və 1240 ədəd siqnal dirəyi quraşdırılacaq. Artıq işlərin 80 faizi görülüb. Tikintinin bu ilin sentyabr ayında başa çatdırılması nəzərdə tutulub.