SİYASƏT
Siyasi ekspert: Avropa Məhkəməsinin Ermənistanın əsassız tələbini rədd etməsi bu qurumun Azərbaycanda hüququn aliliyinə olan etimadın göstəricisidir
Bakı, 12 iyun, Səadət Hakıyeva, AZƏRTAC
İnsan Hüquqları üzrə Avropa Məhkəməsinin Ermənistanın hazırda Azərbaycanda saxlanılan 11 vətəndaşının dərhal sərbəst buraxılması tələbini rədd etməsi təkcə rəsmi İrəvana deyil, ümumiyyətlə, bu qəbildən olan məsələlər üzərindən siyasi manipulyasiyalar edən, əsassız iddialar irəli sürən bütün dairələr üçün tutarlı cavabdır.
Bunu AZƏRTAC-a açıqlamasında siyasi ekspert Elçin Mirzəbəyli bildirib.
E.Mirzəbəyli vurğulayıb ki, Azərbaycan hökuməti həm müharibə, həm də postmüharibə dövründə beynəlxalq humanitar hüququn bütün prinsiplərinə əməl edib, müharibə cinayətləri törədən, yaxud müharibədən sonra ərazilərimizdə təxribat xarakterli davranışlar sərgiləyən, mülki vətəndaşlarımıza və hərbçilərimizə qarşı ağır cinayət əməllərinə yol verən şəxslərə münasibətdə beynəlxalq hüququn prinsiplərinə və ölkə qanunvericiliyinin tələblərini yerinə yetirib.
Siyasi ekspertin sözlərinə görə, Ermənistanın müharibədən sonra Azərbaycanın beynəlxalq səviyyədə tanınmış sərhədlərini pozaraq, ölkəmizin ərazisində ağır cinayət əməlləri törədən və ya törətməyə cəhd göstərən şəxslərin dərhal azad edilməsi ilə bağlı tələbi bu ölkənin siyasi dairələrinin hələ də qəbilə təfəkkürü ilə yaşadıqlarını, hüququn aliliyinə hörmətsiz münasibətlərini nümayiş etdirir. Ermənistanın saxlanılan şəxslərin dərhal sərbəst buraxılması ilə bağlı müraciəti Azərbaycan hökumətinə qanunun aliliyinə hörmətsizlik çağırışına bərabərdir. Bu yanaşma bir daha Ermənistanın hüquqi dövlət kimi formalaşmadığını təsdiqləyir.
Ekspert bildirib ki, Ermənistan tərəfinin Azərbaycanda saxlanılan vətəndaşlarının sərbəst buraxılması ilə bağlı tələbinin özü də sübuta yetirir ki, bu ölkənin rəhbərliyi Avropa İnsan Hüquqları Məhkəməsinin yurisdiksiyası haqqında məlumatlı deyil və ya klassik erməni təfəkkürünə uyğun şəkildə hərəkət edir. Avropa İnsan Hüquqları Məhkəməsi insan hüquqlarının müdafiəsi sahəsində ixtisaslaşdırılmış beynəlxalq məhkəmə orqanıdır, bəzi ölkələrin erməni lobbisi tərəfindən satın alınmış siyasətçilərinin bağ evi deyil. İnsan hüquqlarının müdafiəsi ilə bağlı prosedurların işə salınması üçün, ilk növbədə, Avropa İnsan Hüquqları Konvensiyasının və onun müvafiq protokollarının tələblərinin pozulması lazımdır.
“Məlum olduğu kimi, Ermənistan ordusunun hərbçilərindən ibarət təxribatçı qrupun üzvləri atəşkəs haqqında Bəyanatın imzalanmasından xeyli sonra Azərbaycan ərazilərində cinayət əməlləri törətdiklərinə görə saxlanılıb və onların əməlləri ilə bağlı ölkə qanunvericiliyinə uyğun olaraq müvafiq istintaq hərəkətləri həyata keçirilib. Bununla yanaşı, törətdikləri əməllərin cinayət tərkibindən asılı olmayaraq, Ermənistanın sözügedən vətəndaşlarının hüquqlarının qorunması və vəziyyətləri ilə bağlı bütün tələblər yerinə yetirilib. Beynəlxalq Qırmızı Xaç Komitəsinin nümayəndələrinin, habelə insan haqları üzrə müvəkkilin (ombudsman) həbs olunmuş şəxslərlə görüşləri təşkil edilib, mayın 27-də Azərbaycan hərbçiləri tərəfindən saxlanılan 6 hərbçi də daxil olmaqla, həbsdə olan həmin şəxslərin səhhəti barədə tibbi sənədlər təqdim olunub”, - deyə Elçin Mirzəbəyli bildirib.
Qeyd edilib ki, Azərbaycan Ermənistan hərbçilərinin ölkəmizin ərazilərində törətdikləri ağlasığmaz vəhşiliklərə, ağır müharibə cinayətlərinə rəğmən, onlara qarşı humanizm nümayiş etdirib və hüquqi dövlət anlayışına hakim olan bir dövlət olduğunu, qanunların aliliyini bütün digər amillərdən üstün tutduğunu əməldə sübuta yetirib. Avropa İnsan Hüquqları Məhkəməsinin Ermənistanın əsassız tələbini növbəti dəfə rədd etməsi Azərbaycanda hüququn aliliyinin bütün hallarda üstün tutulmasına olan etimadın göstəricidir.