Stokholm, 29 mart, Rauf Əliyev, AZƏRTAC

Stokholmda İsveçlə Azərbaycan arasında iqtisadi əlaqələrin genişləndirilməsi məqsədilə biznes dairələrinin nümayəndələri üçün xüsusi seminar keçirilib.

AZƏRTAC-ın xüsusi müxbiri xəbər verir ki, Stokholmda yerləşən Dünya Ticarət Mərkəzində reallaşan tədbir İsveçin Avrasiya üzrə Ticarət Palatası və Azərbaycanın İsveç Krallığındakı səfirliyi tərəfindən təşkil olunub. İyirmidən çox şirkətin nümayəndəsinin iştirak etdiyi tədbirdə ölkəmizdə investorlara yaradılan investisiya imkanları barədə ətraflı məlumat verilib.

Seminarda çıxış edən İsveçin Avrasiya üzrə Ticarət Palatasının baş direktoru Heinz Sjögren iki ölkə arasında iqtisadi əlaqələrin inkişaf dinamikası barədə söz açaraq, hazırda Azərbaycanda bir çox İsveç şirkətinin fəaliyyət göstərdiyini bildirib. Onun sözlərinə görə, ölkəmizin əlverişli coğrafi məkanda yerləşməsi, davamlı iqtisadi inkişafa nail olmaq üçün cəlbedici biznes mühitinin formalaşdırması, yeni investorların cəlbinə səbəb olur.

Azərbaycanın İsveç Krallığındakı səfiri Zaur Əhmədov iki ölkə arasında iqtisadi əlaqələrin daha da genişləndirilməsinin yaxından nəzərdən keçirməyə imkan verəcək seminarın mövcud böyük potensialdan yararlanmağa şərait yaradacağına əminliyini ifadə edib. Səfir hazırda Azərbaycanda 30-a yaxın İsveç şirkətinin fəaliyyət göstərdiyini, 70 milyon ABŞ dolları civarında olan illik ticarət dövriyyəsinin heç də ölkələrin real potensialını əks etdirmədiyini qeyd edib. Şərq-Qərb, Şimal-Cənub nəqliyyat dəhlizlərinin kəsişməsində əlverişli coğrafi mövqedə yerləşən ölkəmizin İsveç şirkətləri üçün maraqlı istiqamətə çevriləcəyini bildirib. “Keçən il biz Stokholm və Göteborqda Ələt Azad İqtisadi Zonasının “AFEZ” təqdimat tədbirlərini təşkil etdik. Bakı Beynəlxalq Dəniz Ticarət Limanının yaxınlığında yerləşən AFEZ biznes üçün əlverişli qanunvericilik, fiskal və qeyri-fiskal güzəştlər təklif edir və müştərilərini istifadəyə hazır ərazidən kənarda və ərazidə infrastruktur və kommunal xidmətlərlə təchiz olunmuş sənaye torpaq sahələri ilə təmin edir”, - deyə diplomat söyləyib.

Avropa İttifaqının (Aİ) Azərbaycanın ən böyük ticarət tərəfdaşı olduğunu və xarici ticarətimizin 52 faizinin bu qitənin payına düşdüyünü bildirən Zaur Əhmədov, eyni zamanda, Aİ ölkələri tərəfindən Azərbaycan iqtisadiyyatına 20 milyard avrodan çox sərmayə yatırıldığını ifadə edib: “Aİ ilə tərəfdaşlığımızın artan həcmi və keyfiyyəti əlaqələrimizin təkmilləşdirilməsini zəruri edir. İndiyədək biz Aİ-yə üzv 9 dövlətlə strateji tərəfdaşlıq sənədi imzalamışıq. Ümid edirik ki, İsveçin bu qurumda sədrliyi zamanı dialoqumuzu gücləndirmək və qarşılıqlı maraq doğuran əsas sahələr üzrə daha geniş əməkdaşlıq üçün möhkəm yol açmaq məqsədilə Aİ ilə yeni ikitərəfli saziş üzrə danışıqları yekunlaşdıracağıq”.

Azərbaycanın tranzit nəqliyyat infrastrukturunu da inkişaf etdirdiyini, yeni tikilmiş dəniz ticarət limanı ilə hazırda 15 milyon ton yük daşıma qabiliyyətinə sahib olduğumuzu deyən səfir bunun da xarici şirkətlər üçün maraq doğura biləcəyini bildirib.

Ölkəmizin, həmçinin Avropanın mühüm yaşıl enerji təchizatçısına çevrilməyi planlaşdırdığını söyləyən diplomat, Azərbaycanın bərpa olunan günəş və külək mənbələri potensialının 200 gigavata yaxın olduğunu vurğulayıb. Səfirin sözlərinə görə, Azərbaycan güvənilən tərəfdaş, etibarlı iş ortağı olması səbəbindən 2022-ci ilin dekabrında ölkəmiz Buxarestdə Qara dəniz vasitəsilə Gürcüstandan Rumıniyaya Sualtı kabel xəttinin çəkilməsi haqqında saziş imzalayaraq yeni dövrə qədəm qoyub.

Zaur Əhmədov Azərbaycanın işğaldan azad edilmiş ərazilərinin yenidən qurulmasının hökumətimizin prioritet istiqamətlərindən biri olduğunu da diqqətə çatdırıb. O qeyd edib ki, İsveç şirkətlərinin bu yenidənqurma işlərinə dair dövlət tenderlərində iştirak etmək üçün böyük potensialdan yararlana bilər.

Sonra çıxış edən “Caucasus Consulting Group of Companies” şirkətinin təsisçisi Bəhram Atabəyli İsveç şirkətlərinin Azərbaycan bazarında hazırkı fəaliyyəti barədə danışıb.

İsveç Xarici İşlər Nazirliyinin Şərqi Avropa və Mərkəzi Asiya üzrə bölməsinin müavini Byorn Linderfalk iki ölkə arasında siyasi əlaqələrin son vaxtlar intensiv şəkildə inkişaf etdiyini qeyd edib. Onun sözlərinə görə, siyasi müstəvi ilə yanaşı, ikitərəfli ticarət əlaqələrinin inkişafı böyük əhəmiyyət daşıdığından bu kimi tədbirlərin keçirilməsi labüddür. O, Azərbaycanın hazırda Aİ üçün böyük əhəmiyyətə sahib tərəfdaş halına gəldiyini vurğulayıb. Həmçinin İsveçin Aİ-yə sədrliyi dövründə Azərbaycanla əlaqələrin səmimi dialoq və müzakirələr yolu ilə daha da inkişaf edəcəyinə ümidini ifadə edib.

Seminarda təqdimatla çıxış edən İxracın və İnvestisiyaların Təşviqi Agentliyinin nümayəndəsi ölkəmizdə investisiya imkanları haqqında ətraflı məlumat verib.

İsveçin “Eriksson” telekommunikasiya şirkətinin təmsilçisi Anatoli İliyaç Azərbaycanda inkişaf edən biznes mühiti, həyata keçirdiyi ən qabaqcıl layihələr haqqında təqdimatla çıxış edib.

Sonda söz alan ASPI AQRO MMC Açıq Səhmdar Cəmiyyətinə daxil olan “Savalan” şirkətinin icraçı direktoru Teymur Məmmədov ölkəmizin çaxır istehsalı ənənələri barəsində ətraflı danışıb.

Seminar Azərbaycan və İsveç şirkətlərinin nümayəndələri arasında danışıqlar formatında davam edib.

Rauf Əliyev

AZƏRTAC-ın xüsusi müxbiri

Stokholm