Sumqayıt, 18 oktyabr, Ətrabə Rzayeva, AZƏRTAC

Sumqayıt şəhər Heydər Əliyev Mərkəzində Sumqayıt Regional Mədəniyyət İdarəsinin tərkibinə daxil olan müəssisələrin rəhbərlərinin iştirakı ilə müşavirə keçirilib. Müşavirədə ötən doqquz ayda görülən işlər müzakirə olunub.

AZƏRTAC xəbər verir ki, idarə rəisi Mehman Şükürov çıxış edərək, bu günlərdə Mədəniyyət Nazirliyinin regional siyasət şöbəsinin müdiri Pərviz İsgəndərlinin, hüquq və daxili nəzarət şöbəsinin müdiri - aparat rəhbərinin müavini Namiq Qulamovun Sumqayıt Regional Mədəniyyət İdarəsində keçirdikləri görüş barədə məlumat verib. Qeyd edilib ki, görüş zamanı idarənin fəaliyyəti müzakirə olunub, uğurlardan və problemlərdən danışılıb, irad və təkliflər bildirilib, görüləcək işlərlə bağlı fikir mübadiləsi aparılıb, tapşırıqlar verilib.

Mehman Şükürov doqquz ay ərzində görülən işlər haqqında hesabat verərək bildirib ki, tabe müəssisələrdə bir sıra tədbirlər keçirilib. Uğurlarla bərabər əsasən ödənişli xidmətlərin təşkilində problemlərin olduğu da bildirilib. Qeyd edilib ki, idarənin şəbəkəsinə daxil olan mədəniyyət müəssisələri ödənişli xidmətlə fəaliyyət göstərməlidir. Xüsusilə musiqi məktəbləri, muzey və rəsm qalereyalarının ödənişli xidmətə keçirilməsinin vacibliyini vurğulayan idarə rəisi, klub müəssisələrində də ödənişli kursların sayının artırılmasının, insanların maraqlarına cavab verən kursların təşkilinin, eyni zamanda, folklor kollektivlərinin yaradılmasının, sənətkarlıq növlərinin araşdırılaraq haqqında məlumatların hazırlanmasının və bununla əlaqədar tədbirlərin keçirilməsinin önəmini diqqətə çatdırıb.

“Mədəniyyət müəssisələrinə gənc kadrlar cəlb olunmalıdır. Yeni düşüncəyə, yeni fikrə ehtiyac var. Yeni təkliflər verilməli, layihələr həyata keçirilməlidir”, - deyən idarə rəisi ehtiyat kadrların hazırlanmasından danışıb, işinə ciddi yanaşmayan, məsuliyyətsizlik edən, nizam-intizam qaydalarını pozan əməkdaşlar haqqında cəza tədbirlərinin görüləcəyini bildirib.

İdarə rəisinin müavini İlham Əhmədov çıxış edərək musiqi məktəblərində tarifikasiya işlərinin aparılması, müəssisələrdə həyata keçirilən daxili nəzarətin nəticələri ilə bağlı məlumat verib.

Sonra müşavirə iştirakçıları Heydər Əliyev Mərkəzində Sumqayıt şəhər Diyarşünaslıq klubu tərəfindən Müstəqillik Gününə həsr olunmuş tədbirə qatılıblar. Tədbirdə klubun rəsm kursunun şagirdlərinin Pazl Art və rəsm əsərlərindən ibarət sərgisi nümayiş olunub, gənc solistlərin ifasında mahnılar dinlənilib, “Saz” qrupunun və “Odlar yurdu” rəqs qrupunun çıxışları izlənilib.

Sonda istedadlı uşaqlar Sumqayıt Regional Mədəniyyət İdarəsinin fəxri fərmanı ilə təltif olunublar.