Bakı, 24 sentyabr (AZƏRTAC). Azərbaycanın ən uğurlu investisiya qruplarından biri olan “Synergy Group”un yeni korporativ strategiyası hazırlanıb. “Synergy Group”un Müşahidə Şurası sədrinin müavini Fəxriyar Cabbarov qeyd edir ki, yeni korporativ strategiya holdinqin idarə edilməsinin effektivliyini yüksəldəcək. Qısamüddətli perspektiv baxımından investisiya qrupunun qarşısında bir sıra məsələlər durur. Buraya törəmə müəssisələrin fəaliyyət səmərəliliyinin yüksəldilməsi, keyfiyyətli kadr və maliyyə kapitalının artırılması, həmçinin Azərbaycan iqtisadiyyatında əlavə investisiya imkanlarının analizi daxildir.

“Synergy Group”dan AZƏRTAC-a verilən məlumata görə, Fəxriyar Cabbarov holdinqin hazırda uzunmüddətli perspektiv baxımından aktiv şəkildə diqqət yetirmək istədiyi əsas iqtisadiyyat sahələrinin analizi və seçilməsi mərhələsində olduğunu bildirib. “Respublika rəhbərliyi sənaye sektorunun inkişafına xüsusi diqqət yetirir. Həmin tendensiyalar bizim holdinqdə də nəzərə alınır. Məsələn, bu il biz Gəncə-Qazax bölgəsində ictimaiyyətə bir sıra sənaye layihəsi təqdim etmişik. Onların arasında əhəng emalı zavodunu inşa edən “Ecolime”, Şəmkir rayonunun Zəyəm qəsəbəsində iri qabaritli metal konstruksiyaların istehsalı üçün nəzərdə tutulan “Texnologiyalar Parkı”, Qaradağ ərazisində dam və fasad örtükləri istehsal edəcək fibrosement zavodunu qeyd edə bilərik. “Synergy Group”, həmçinin ölkədə “gobustone” brendi ilə qazobeton bloklar istehsal edən yeganə şirkətdir” - deyə F.Cabbarov vurğulayıb.

Müşahidə Şurası sədrinin müavini qeyd edib ki, 2015-ci ildə holdinq öz seqmentində unikal olan və hazırda tikintisi davam edən “Azerbaijan Fibro Cement” zavodunu istismara vermək niyyətindədir. Ekoloji cəhətdən yüksək səviyyədə olan müəssisə qabaqcıl Avstriya texnologiyasından istifadə edərək “sıfır tullantı” prinsipi ilə fəaliyyət göstərəcək. Fibrosement lövhə insan sağlamlığı və ətraf mühit üçün təhlükəsiz tikinti materialı olmaqla, Azərbaycanın tikinti bazarına yeni nəfəs gətirəcək.

“Synergy Group”, həmçinin ölkədə təhsilin və müxtəlif idman növlərinin inkişafına yönəlmiş Korporativ Sosial Məsuliyyət çərçivəsində qarşısına qoyduğu məqsədlərə sadiqdir. Bu haqda da məlumat verən F.Cabbarov deyib ki, “Synergy Group” velosiped idman növünün inkişafını dəstəkləyir. Məqsəd Azərbaycan velosipedçilərini 2016-cı il Olimpiadası, eləcə də 2015-ci ildə Bakıda keçiriləcək Avropa Oyunları kimi beynəlxalq səviyyəli idman yarışlarına hazırlamaqdır. “Synergy Group”un dəstəyi ilə Şəmkir şəhərində Vüqar Həşimovun xatirəsinə həsr olunmuş beynəlxalq şahmat turniri böyük əks-səda doğurub. Öz növbəsində, holdinqin baş sponsorluğu ilə həyata keçirilən “Parlaq Zəka” telelayihəsi Azərbaycanda istedadlı gənclərin üzə çıxarılmasına və biliklərinin möhkəmləndirilməsinə kömək məqsədi daşıyır.

Xatırladaq ki, “Synergy Group” tikinti materiallarının və iriqabaritli metal konstruksiyaların istehsalı, otelçilik, informasiya texnologiyaları, kənd təsərrüfatı, eləcə də poliqrafiya sahələrinə fəal şəkildə sərmayə yatıran qabaqcıl investisiya holdinqlərindən biridir. Onun strukturuna iqtisadiyyatın müxtəlif sahələrində fəaliyyət göstərən 28 şirkət daxildir.