ELM VƏ TƏHSİL
TURİZM SAHƏSİNDƏ KORPORATİV ŞƏBƏKƏ YARADILMIŞDIR
Gənclər, İdman və Turizm Nazirliyinin sifarişi ilə Azərbaycan Milli Elmlər Akademiyasının İnformasiya Texnologiyaları İnstitutunda turizm sahəsində informasiyanın operativ toplanması və emalı üzrə korporativ şəbəkə yaradılmışdır.
İnstitutdan AZƏRTAC-ın müxbirinə bildirmişlər ki, sistem nazirliklə respublikada turizm ilə məşğul olan 100-dək firma və mehmanxana arasında operativ informasiya mübadiləsi həyata keçirməyə imkan verir. Bundan əlavə, sistem Azərbaycana gələn və ölkəmizdən gedən turistlərin dövlətlər, regionlar, qitələr, istifadə etdikləri nəqliyyat növləri, gecələmə yerləri ( mehmanxana, qonaq evləri və s.), qalma müddəti kimi göstəricilər üzrə nazirlik, Dünya Turizm Təşkilatı, Dövlət Statistika Komitəsi və digər qurumlar üçün hesabatların operativ hazırlanmasını təmin edir.
Hazırda sistemin tətbiqi ilə əlaqədar olaraq MEA-nın İnformasiya Texnologiyaları İnstitutunun tədris mərkəzində turizm firmalarının nümayəndələri üçün təlim kursları keçirilir.