Bakı, 19 may (AZƏRTAC). Məşhur Norveç səyyahı Tur Heyerdalın qədim misirlilərin maketi üzrə qamışdan quraşdırılmış “Ra“ qayığında ekspedisiyasının ilk səfərindən 40 il ötür. Səyahətçilər bir neçə həftə ərzində Barbados sahillərinə çataraq sübut etmişlər ki, qədim dəniz səyyahları da transatlantik səfərlərinə çıxa bilirdilər. Onlar Aralıq dənizi sahillərindən dənizə çıxaraq Atlantik okeanını keçmiş və Meksika aborigenlərinə sivilizasiyanın əsaslarını gətirmişlər.

Tur Heyerdal dünya səyahətinə komandası ilə çıxırdı. Təkbaşina dünya səyahətinə çıxanlar isə çoxdur. İlk belə səyyah kapitan Coşua Slokumdur. ABŞ-ın Nyuport məntəqəsindən 1895-ci il aprelin 24-də səfərə çıxan Slokum ümumilikdə 74 min kilometr məsafə qət edərək 1898-ci il iyulun 3-də Rod-Aylendə qayıtmışdır.

Britaniyalı Çey Blaytın 1970-ci il oktyabrın 18-də başlanmış dünya səyahəti isə 292 gün davam etmişdir.

Rus səyahətçisi Fyodr Konyuxov planetimizin 5 qütbünə səfər edən ilk insandır. O, 50 yaşınadək 4 dəfə dünya səyahətinə çıxmışdır.

Atlantik okeanını təkbaşına üzüb keçən ilk insan ingilis Con Feyerfaksdır. Dünya sıyahətinə təkbaşına çıxan ilk qadın isə avstraliyalı Keyt Kottidir.

Ən gənc dəniz səyahətçisi avstraliyalı Cessika Uotson hesab edilir. 16 yaşlı bu qız 2010-cu il mayın 15-də təqribən 7 ay davam edən səyahətini başa vurmuşdur.

Hindistanlı Aşok Kumarın adı “Ginnesin rekordlar kitabı”na düşmüşdür. Aşok Kumar 16 il müddətində Asiya, Afrika, Avropa və Amerika ölkələrinə, habelə Avstraliyaya motosikletlə səyahət etmişdir. Böyük Britaniya velosipedçisi Uolter Stoun isə dünya səyahətinə 17 il sərf etmişdir. 24 yaşlı İngiltərə jurnalisti Hemri Uilson ən böyük rekord əldə etmişdir. O, Yer Kürəsi ətrafında qaçışla 30 min kilometr məsafə qət etmişdir.