Bakı, 9 sentyabr, Nicat Məmmədov, AZƏRTAC

Sentyabrın 8-də UEFA Millətlər Liqasının növbəti oyunları ilə turnirin birinci turuna yekun vurulub.

AZƏRTAC xəbər verir ki, üçüncü oyun gününün maraqla gözlənilən qarşılaşması "Uembli" stadionunda oynanılıb. "A" liqasının 4-cü qrupunda yer alan İngiltərə millisi İspaniya seçməsini qəbul edib. Oyunda hesabı erkən qolla 11-ci dəqiqədə ingilislər açıb. Luk Şovun cinah ötürməsini Markus Reçford dəqiq zərbə ilə tamamlayıb - 1:0. Qoldan üç dəqiqə sonra ispanlar hesaba tarazlıq gətirib. İspaniya millisinin hücumçusu Rodriqo rəqibin iki müdafiəçisini keçərək qapı qarşısına ötürmə verib. Topa ən tez yetişən Saul adını tabloya yazdırıb - 1:1. Fasiləyə qədər İspaniya seçməsi ikinci qolu da meydan sahiblərinin qapısından keçirib. Matçın 32-ci dəqiqəsində hakimin təyin etdiyi cərimə zərbəsindən sonra Tiaqo Alikantara rəqibin meydançasında olan Rodriqoya ötürmə verib. Sonuncu qapını dəqiq hədəf alıb - 1:2. Birinci hissə bu hesabla başa çatıb.

Fasilədən sonra hər iki komandanın cəhdlərinə baxmayaraq hesab dəyişməyib.

Günün digər oyununda "A" liqasının 2-ci qrupunda yer alan son dünya çempionatının iştirakçıları İsveçrə və İslandiya yığmaları üz-üzə gəliblər. Görüş isveçrəlilərin böyük hesablı qələbəsi ilə başa çatıb (6:0).

"B" liqasının 3-cü qrupunda yer alan Şimali İrlandiya yığması doğma meydanda Bosniya və Herseqovina millisinə məğlub olub (1:2).

Turun üçüncü günündə Azərbaycan millisinin liqasında yer alan, 2-ci qrupda qərarlaşan San-Marino seçməsi səfərdə Belarus yığmasının qonağı olub. Görüş meydan sahiblərinin 5:0 hesablı qələbəsi ilə başa çatıb. Həmin qrupda yer alan Lüksemburq-Moldova görüşü 4:0 hesabı ilə lüksemburqluların qələbəsi ilə yekunlaşıb.

"C" liqasının 2-ci qrupunda yer alan Finlandiya yığması Macarıstan seçməsini qəbul edib. Görüş 1:0 hesabı ilə finlandiyalıların qələbəsi ilə başa çatıb. Qrupun digər oyununda isə Yunanıstan yığması səfərdə Estoniya millisindən üstün olub (1:0).

Xatırladaq ki, “D” liqasının 3-cü qrupunda yer alan Azərbaycan millisi sentyabrın 7-də Bakı Olimpiya Stadionunda Kosovo yığması ilə görüşdə qolsuz heç-heçə edib. Azərbaycan seçməsi növbəti oyununu sentyabrın 10-da səfərdə Malta yığmasına qarşı keçirəcək.