CƏMİYYƏT


Ulu öndər Heydər Əliyevin anadan olmasının 96-cı ildönümü Fövqəladə Hallar Nazirliyində qeyd edilib VİDEO

Bakı, 10 may, AZƏRTAC 

Mayın 10-da Fövqəladə Hallar Nazirliyinin (FHN) inzibati binasında Azərbaycan xalqının ümummilli lideri, dahi öndər Heydər Əliyevin anadan olmasının 96-cı ildönümünə həsr edilən tədbir keçirilib.

FHN-dən AZƏRTAC-a bildiriblər ki, əvvəlcə nazirliyin kollektivi Fəxri xiyabana gələrək ümummilli lider Heydər Əliyevin məzarını ziyarət edib, Ulu Öndərin xatirəsini ehtiramla yad edərək məzarı önünə gül-çiçək dəstələri qoyub.

FHN-in inzibati binasında keçirilən tədbir dövlət himninin səslənməsi ilə başlayıb.

Fövqəladə hallar naziri, general-polkovnik Kəmaləddin Heydərov tədbirdə çıxış edərək müasir müstəqil Azərbaycan dövlətinin memarı və qurucusu, dahi şəxsiyyət, ulu öndər Heydər Əliyevin adının xalqımızın tarixinə qızıl hərflərlə yazıldığını diqqətə çatdıraraq, Ulu Öndərin ölkəmizə rəhbərlik etdiyi dövrün dövlətçilik tariximizin ən şanlı səhifələrindən biri olduğunu deyib. Nazir bildirib ki, xalqımızın mənafeyini daim hər şeydən yüksək tutan Dahi Öndər hələ sovet dönəmində Azərbaycana rəhbərlik etdiyi illərdə respublikamızın çiçəklənməsi üçün mütərəqqi addımlar ataraq böyük uzaqgörənlik və müdrikliklə Azərbaycanın gələcək müstəqilliyinə əsaslı zəmin yaradıb. 1993-cü ildə xalqın təkidli tələbi ilə hakimiyyətə qayıdan Heydər Əliyev ölkəmizi xaos, anarxiya və özbaşınalıqdan xilas etdi.

K.Heydərov deyib ki, Azərbaycanı qardaş qırğını və məhv olmaq təhlükəsindən qoruyan, dövlətçilik ənənələrini bərqərar edən Ümummilli Liderin müdriklik, uzaqgörənlik və qətiyyətlə müəyyən etdiyi mütərəqqi siyasi kurs sayəsində ölkəmiz qısa müddətdə davamlı və sürətli inkişaf yoluna çıxdı. Məhz ümummilli lider Heydər Əliyevin əsasını qoyduğu inkişaf konsepsiyası Azərbaycanın bu gün dünyanın sayılıb-seçilən ölkələrindən birinə çevrilməsinə şərait yaradıb.

Nazir vurğulayıb ki, Heydər Əliyevin siyasi kursu bu gün Prezident İlham Əliyev tərəfindən uğurla davam və inkişaf etdirilir. Bunun nəticəsidir ki, regionun liderinə çevrilmiş ölkəmiz dünya birliyinin layiqli üzvü kimi regional və qlobal əhəmiyyətli layihələrin reallaşdırılmasına əvəzedilməz töhfələr verir. Dövlətimizin başçısının uzaqgörənliklə atdığı addımlar, bilavasitə təşəbbüsü ilə həyata keçirilən tədbirlər, reallaşdırılan mütərəqqi islahatlar sayəsində ölkəmiz durmadan inkişaf edir, qlobal təlatümlərdən uğurla yan keçir.

Yeni Azərbaycan Partiyası icra katibinin müavini, Milli Məclisin ictimai birliklər və dini qurumlar komitəsinin sədri Siyavuş Novruzov ulu öndər Heydər Əliyevin Azərbaycan xalqı qarşısında misilsiz xidmətlərindən danışıb. Bildirib ki, Heydər Əliyev zamana qalib gəlməyi bacaran dahi və nadir şəxsiyyətlərdəndir. Qəlbi hər zaman Azərbaycanla döyünən Ümummilli Lider fəaliyyətinin bütün dövrlərində xalqımızın yüksək rifahı, işıqlı gələcəyi, inkişafı naminə var gücü ilə çalışıb. Qədirbilən xalqımızın qəlbində əbədi yaşayacaq Ulu Öndərin müəyyən etdiyi mütərəqqi daxili və xarici siyasətin nəticəsidir ki, Azərbaycan bu gün mürəkkəb geostrateji məkanda yerləşməyinə baxmayaq, yüksək inkişaf tempini qoruyur. Sabitlik, əmin-amanlıq, davamlı inkişafın bərqərar olduğu ölkəmizdə əldə olunan bütün uğurların əsası olan bu siyasi kurs Prezident İlham Əliyev tərəfindən böyük məharətlə davam etdirilir. Son illər ölkəmizin əldə etdiyi uğurlar onu deməyə əsas verir ki, Ulu Öndərin şah əsəri olan müasir müstəqil Azərbaycan etibarlı əllərdədir.

Tədbirə yekun vuran nazir K.Heydərov qeyd edib ki, bu gün həm də Heydər Əliyev Fondunun yaradılmasının 15 illiyi tamam olur. Azərbaycan Respublikasının Birinci vitse-prezidenti Mehriban xanım Əliyevanın rəhbərliyi ilə uğurla fəaliyyət göstərən Heydər Əliyev Fondu ötən dövrdə Azərbaycan xalqı qarşısında böyük xidmətlər göstərib. Müxtəlif problemlərin, o cümlədən baş vermiş ayrı-ayrı fövqəladə hadisələrin nəticələrinin aradan qaldırılmasında, çıxılmaz vəziyyətə düşmüş insanlara hərtərəfli yardımların göstərilməsində və s. istiqamətlərdə gördüyü çoxşaxəli fəaliyyəti sayəsində bu gün Heydər Əliyev Fondu xalqın dərin sevgisini qazanıb. Nazir nümunə olaraq bu il fevralın 5-də və 6-da baş vermiş zəlzələ nəticəsində Ağsu, Şamaxı və İsmayıllı rayonlarında zərər çəkmiş evlərin və sosial təyinatlı obyektlərin tikinti və bərpası ilə bağlı Fondun gördüyü böyük işləri qeyd edib. O, bütün bu xidmətlərə görə Azərbaycan Respublikasının Prezidenti İlham Əliyevə və Birinci vitse-prezident, Heydər Əliyev Fondunun prezidenti Mehriban xanım Əliyevaya Fövqəladə Hallar Nazirliyinin kollektivi adından dərin təşəkkürünü bildirib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.