CƏMİYYƏT


Ulu öndər Heydər Əliyevin anadan olmasının 99-cu ildönümü Ali Məhkəmədə qeyd edilib

Bakı, 11 may, AZƏRTAC

Mayın 10-da Azərbaycan Respublikası Ali Məhkəməsində Ulu öndər Heydər Əliyevin anadan olmasının 99-cu ildönümü ilə əlaqədar yığıncaq keçirilib.

Ali Məhkəmənin mətbuat xidmətindən AZƏRTAC-a bildiriblər ki, tədbirdə Ali Məhkəmənin sədri Ramiz Rzayev çıxış edərək böyük tarixi şəxsiyyət olan Heydər Əliyevin şərəfli ömür yolundan, Azərbaycan xalqı qarşısındakı xidmətlərindən danışıb.

Ali Məhkəmənin sədri qeyd edib ki, ulu öndər Heydər Əliyevin bütün siyasi və dövlətçilik fəaliyyəti çağdaş Azərbaycanın, xalqımızın, milli dövlətçiliyin inkişafı və möhkəmlənməsi tarixidir. Onun Azərbaycana rəhbərlik etdiyi dövrlər ölkəmizin iqtisadi, ictimai-siyasi, mədəni-mənəvi yüksəlişi, tərəqqisi ilə fərqlənir.

Heydər Əliyev Azərbaycan tarixində yeganə şəxsiyyət-rəhbərdir ki, keçmiş SSRİ kimi dövlətin siyasi rəhbərlik zirvəsinə yüksəlib və dünyanın tanınmış dövlət və siyasi xadimləri sırasında ən görkəmli və böyük təsirə malik olan dünya şöhrətli siyasətçi olduğunu əməli fəaliyyəti ilə göstərib.

Heydər Əliyevin şəxsiyyəti, həyatı və fəaliyyəti görkəmli dövlət və siyasi xadim kimi müasir Azərbaycan tarixinin parlaq səhifəsini təşkil edir.

Ulu Öndər böyük azərbaycançı idi. Daim Vətənin müqəddəratı, xalqın taleyi barədə düşünən Heydər Əliyev müasir Azərbaycan tarixinə müstəqilliyimizin memarı, dövlətçiliyimizin xilaskarı və yaradıcısı kimi düşüb.

Müstəqil Azərbaycanın neft strategiyasının “Əsrin müqaviləsi”nin bağlanması Heydər Əliyev şəxsiyyətinin siyasi uzaqgörənliyinin nəticəsidir. Bu müqavilə Azərbaycanın iqtisadi inkişafında, dünyaya inteqrasiyasında mühüm rol oynayıb.

Ulu Öndərin həyatı xalqımızın bu günü və gələcək taleyi ilə bağlıdır. 1995-ci ilin noyabrında Heydər Əliyevin rəhbərliyi ilə müstəqil Azərbaycanın Konstitusiyası hazırlanıb və ümumxalq referendumunda qəbul olunub. Bu Konstitusiya hüquq dövlət quruculuğu istiqamətində atılan ən böyük addım olub. İnsan hüquq və azadlıqlarının başlığa prinsiplərinin də bərqərar olması üçün əsaslı zəmin yaradıb.

Böyük siyasi və dövlət xadimi Heydər Əliyev islahatçı rəhbər olub. Məhkəmə hakimiyyətinin cəmiyyətdə rolunu artırmaq üçün ciddi islahatlar aparıb. Bunun nəticəsi olaraq insan hüquq və azadlıqlarının təminatlı müdafiəsi üçün ölkədə üçpilləli məhkəmə sistemi yaradılıb, hakim korpusunun formalaşmasında tamam yeni üsul və metodlardan istifadə edilib. Hakim vəzifəsinə ədalətli və şəffaf seçim məhkəmə hüquq islahatlarının keyfiyyətlə aparılmasına təkan verib.

Məhz ulu öndər Heydər Əliyevin rəhbərliyi ilə ölkəmizdə müasir, mütəşəkkil, qüdrətli ordu quruculuğu istiqamətində uğurlu islahatlar həyata keçirilib. Heydər Əliyevin təşəbbüsü ilə Azərbaycanda yaradılmış Cəmşid Naxçıvanski adına Hərbi Lisey yüzlərlə peşəkar hərbçi kadr hazırlayaraq müstəqillik illərində Azərbaycan Silahlı Qüvvələrinin formalaşmasında müstəsna dərəcədə rol oynayıb.

Ali Məhkəmənin sədri ulu öndər Heydər Əliyevin ideyalarının yaşadığını və Azərbaycanı zirvədən zirvəyə, qələbədən qələbəyə apardığını bildirərək bu ideyaların dahi rəhbərimizin siyasi kursunun layiqli davamçısı Prezident İlham Əliyev tərəfindən uğurla gerçəkləşdirildiyini vurğulayıb. Onun yaratdığı müstəqil Azərbaycan Respublikası möhkəmlənir, inkişaf edir, dünyanın sayılan sivil dövləti kimi şöhrətlənir.

Bu gün Azərbaycan xalqı böyük qürur hissi keçirir. Ona görə ki, 30 il həsrətində olduğu Qarabağ Ali Baş Komandanın rəhbərliyi və rəşadətli Azərbaycan Ordusunun şücaəti ilə 44 günlük Vətən müharibəsində erməni işğalçılarından azad edilib. Bu, məhz Heydər Əliyev strategiyasının qələbəsidir.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.