CƏMİYYƏT
Vətən müharibəsi nəticəsində Gəncədə və Bərdədə psixoloji problemlər yaşayan vətəndaşlarımızın reabilitasiyasına başlanılır
Bakı, 25 fevral, AZƏRTAC
Qırx dörd günlük Vətən müharibəsi nəticəsində psixoloji problemlər yaşayan qazilərimizin, o cümlədən doğmalarını itirmiş şəhid ailəsi üzvlərinin, erməni terrorundan fiziki və mənəvi zərər görmüş vətəndaşlarımızın psixoloji reabilitasiyasının daha səmərəli təşkili məqsədilə Fövqəladə Hallar Nazirliyinin (FHN) dəvəti ilə qardaş Türkiyədən ölkəmizə gələn bir qrup peşəkar klinik-psixoloq və psixoterapevt fəaliyyətini davam etdirir.
FHN-in mətbuat xidmətindən AZƏRTAC-a bildiriblər ki, nazirliyin 112 - qaynar telefon xətti vasitəsilə psixoterapevtik yardım üçün qeydiyyata yazılmış vətəndaşlarımızdan bu günədək 520-dək şəxsə mütəxəssislər tərəfindən müvafiq yardım göstərilib.
Fevralın 26-dan etibarən Türkiyədən olan psixoloq mütəxəssislərin iştirakı ilə Bakı ilə yanaşı, Gəncə və Bərdə şəhərlərində də müharibədən və erməni terrorundan fiziki və mənəvi zərər görmüş vətəndaşlarımızın psixoloji reabilitasiyası işinə başlanılacaq.
Ödənişsiz psixoloji yardım almaq üçün FHN-in 112 - qaynar telefon xəttinə zəng etmək lazımdır.