Bakı, 10 fevral, Aidə Quluzadə, AZƏRTAC

Fevralın 10-da Milli Məclisin insan hüquqları komitəsinin iclası keçirilib.

AZƏRTAC xəbər verir ki, sədr Rəbiyyət Aslanova əvvəlcə 2014-cü il payız sessiyası ərzində komitə tərəfindən görülmüş işlər barədə danışıb. Sonra komitənin 2015-ci il yaz sessiyası üçün görüləcək işlər planı layihəsi haqqında məlumat verilib.

Daha sonra iclasın gündəliyində duran “Vətəndaşların müraciətləri haqqında” qanun layihəsi müzakirəyə çıxarılıb. Məlumat verilib ki, 1997-ci ildə qəbul olunmuş “Vətəndaşların müraciət qaydaları haqqında” qanun tamamilə yenidən işlənib və təkmilləşdirilib. Həmin qanuna görə vətəndaşların araşdırılması rəsmi tələb olunan 3 rəsmi müraciət - təklif, ərizə və şikayət forması var idisə, yeni qanun layihəsində bu, artırılaraq 10 müraciət formasına çatdırılır. Buraya hazırda qüvvədə olan 3 müraciət formasından başqa elektron, şifahi, telefon, anonim, kollektiv müraciətlərlə yanaşı, teleradio vasitəsilə edilən müraciətlər də daxildir. Əlavə olunmuş yeni müddəalar vətəndaşların müxtəlif üsullarla vəzifəli şəxslərə, aidiyyəti qurumlara müraciətini təmin edəcək, qanun pozuntularının qarşısını alacaq.

Qanun layihəsində vətəndaşların müraciətlərinin araşdırılması, cavablandırılması müddəti, prinsipləri və xüsusiyyətləri yeni formada əksini tapır. Layihədə qeyd olunub ki, bu qanunun tələblərinin pozulmasına görə şəxslər Azərbaycan Respublikasının Mülki, İnzibati Xətalar və Cinayət məcəllələrinə uyğun olaraq məsuliyyət daşıyırlar.

Daha sonra iclasda “Dini etiqad azadlığı haqqında” Qanunda dəyişikliklər edilməsi barədə qanun layihəsi müzakirə olunub.

Bildirilib ki, qanunun dini ədəbiyyat və dini təyinatlı əşyalarla bağlı 22-ci maddəsinə edilən dəyişikliyə əsasən nəzarət markasının forması, uçotu, istifadəsi və verilməsi qaydaları, habelə nəzarət markasının alınmasına görə ödənilən haqqın məbləği müvafiq icra hakimiyyəti orqanı tərəfindən müəyyən edilir. Nəzarət markasının alınmasına görə ödənilən vəsaitlər dövlət büdcəsinə köçürülür. Həmin vəsaitlərin dövlət büdcəsinə daxil olmasına nəzarət edilməsi və uçotunun aparılması qaydası müvafiq icra hakimiyyəti tərəfindən müəyyən edilir. Müvafiq icra hakimiyyəti orqanı nəzarət markalarının hazırlanmasını təmin edir. Bu qanunun 12-1-ci maddəsində edilən dəyişikliklər isə texniki xarakter daşıyır.

Bundan başqa, iclasda “Siyasi partiyalar haqqında” Qanunun 16.3-cü maddəsinə texniki dəyişiklik edilməsi məsələsi də müzakirə olunub.

Qanun layihələri parlamentin plenar iclasına tövsiyə olunub.