DÜNYA


Yaponiya hökuməti COVID-19 ilə əlaqədar fövqəladə vəziyyət rejiminin müddətini uzatmaq niyyətindədir

Tokio, 8 sentyabr, AZƏRTAC

Yaponiya hökuməti Tokio da daxil olmaqla bir neçə prefekturada COVID-19 ilə əlaqədar fövqəladə vəziyyət rejiminin müddətini uzatmaq üçün müzakirələr aparır.

AZƏRTAC Yaponiya KİV-lərinə istinadla xəbər verir ki, Tokio, Osaka və daha 19 prefekturada vəziyyətin hələ də ağır olduğu nəzərə alınaraq, hökumət sentyabrın 12-də başa çatacaq fövqəladə vəziyyət rejiminin müddətini uzatmaq niyyətindədir. Digər 12 prefekturada isə koronavirusa qarşı intensiv tədbirlərin davam etdirilməsi nəzərdə tutulur.

Bildirilir ki, Hiroşima prefekturası hökumətə regionda fövqəladə vəziyyət rejiminin uzadılması barədə xahişlə artıq müraciət edib.

Fukuoka prefekturası da hökuməti fövqəladə vəziyyət rejimi aradan qaldırılacağı təqdirdə koronavirusa qarşı mübarizənin ağır olacağı barədə məlumatlandırıb.

Osakanın qubernatoru Yoşimura Hirofumi isə qeyd edib ki, prefekturadakı xəstəxanalarda çarpayıların çatışmadığı şəraitdə fövqəladə tədbirlərini yumşaltmaq olmaz.

Hökumət gündəlik yoluxma sayının azalmasına baxmayaraq, ağır xəstələrin sayının hələ də çox olmasını və səhiyyənin vəziyyətinin çətin olmasını nəzərə alaraq, fövqəladə rejimin uzadılması məqsədilə müzakirələri davam etdirir.

Avqustun 9-da Baş nazir Yoşihide Suqanın rəhbərlik etdiyi hökumətin yekun qərar qəbul etmək üçün mütəxəssislərlə görüşəcəyi gözlənilir.

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.