ELM VƏ TƏHSİL
Yeni tədris ilində peşə təhsili müəssisələrinin rəhbərləri ilə görüş keçirilib
Bakı, 16 sentyabr, AZƏRTAC
Sənaye və İnnovasiyalar üzrə Bakı Dövlət Peşə Təhsil Mərkəzində peşə təhsili müəssisələrinin rəhbərləri ilə görüş keçirilib.
Peşə Təhsili üzrə Dövlət Agentliyindən AZƏRTAC-a bildirilib ki, tədbirdə bir sıra təhsil müəssisələrinin rəhbərləri hesabat çıxışı ediblər. Agentliyin Təhsil standartları və tədris resursları şöbəsinin müdiri Məcid Bayramlı yeni tədris proqramları və tədris standartlarının tətbiqi barədə ətraflı məlumat verib. Peşə Təhsili üzrə Dövlət Agentliyinin direktoru Pərviz Yusifov yeni tədris ilində peşə təhsili sahəsində qarşıda duran əsas vəzifələrdən bəhs edib.
Tədbir Koreya standartları əsasında yaradılan mərkəzə səfər turu ilə sona çatıb.
Xatırladaq ki, 2019-2020-ci tədris ilində fəaliyyətə başlayan mərkəz Azərbaycan və Koreya hökumətləri arasında razılaşmaya uyğun olaraq, Koreya təhsil standartları əsasında yaradılan ilk pilot peşə təhsili müəssisəsidir. Sözügedən təhsil müəssisəsi mexanika, elektronika, elektrik mühəndisliyi, sənayedə quraşdırma işləri, tikinti, informasiya texnologiyaları, avtomobil və avtomatlaşdırma istiqamətləri üzrə ən müasir avadanlıq, təlim və tədris vəsaitləri ilə təchiz olunub. Təhsilalanların bilik və bacarıqlarının inkişaf etdirilməsi üçün əlverişli şərait yaradılıb. Tədris prosesində istifadə edilən kurikulumlar koreyalı ekspertlər, habelə özəl sektor nümayəndələrinin iştirakı ilə hazırlanıb.
Ən müasir maddi-texniki baza ilə təchiz edilmiş mərkəzdə torna və frezer dəzgahları operatoru, avtomobil diaqnostikası və təmiri ustası, sənayedə quraşdırma işləri üzrə usta, elektronika ustası, elektrik avadanlıqlarına xidmət və təmir üzrə elektrik montyoru, inşaat ustası, veb-dizayner və proqram təminatçısı, avtomatika ustası ixtisasları üzrə 1 illik proqramlarda təhsil almaq olar.