Zaqatalada aztəminatlı evdar qadınların məşğulluq məsələlərinə diqqət göstərilir

Zaqatala, 29 iyun, Mustafa Dadaşov, AZƏRTAC

İyunun 29-da Zaqatala Uşaq və Ailələrə Dəstək Mərkəzinin (UADM) təşkilatçılığı ilə rayondakı Heydər Əliyev Mərkəzində aztəminatlı evdar qadınların məşğulluq məsələləri ilə bağlı maarifləndirici tədbir keçirilib.

Zaqatala UADM-nin direktoru Cövhərət İbrahimovanın AZƏRTAC-ın bölgə müxbirinə verdiyi məlumata görə, Zaqatala Qadın Resurs Mərkəzinin sahibkar üzvlərinin və evdar qadınların iştirak etdiyi tədbirin məqsədi qadınlar arasında kiçik sahibkarlığın inkişaf etdirilməsi, onların maliyyə savadlılığının və informasiya texnologiyalarından istifadə bacarıqlarının artırılması olub.

Bildirilib ki, tədbirdə Qadın Resurs Mərkəzindən faydalanan qadınlar öz biznesləri barədə məlumat verib, bacarıq və qabiliyyətlərini aztəminatlı evdar qadınlarla bölüşüblər.