Ölkəmizdə rəsmi səfərdə olan Türkiyə Böyük Millət Məclisinin sədri Ömər İzgi və onu müşayiət edən şəxslər fevralin 8-də Milli Məclisdə daimi komissiyaların sədrləri və  Azərbaycan-Türkiyə parlamentlərarası dostluq qrupunun üzvləri ilə görüşmüşlər.

        Parlamentlərarası dostluq qrupunun rəhbəri, Milli Məclisin deputatı Anar Rzayev görüşü açaraq qrupun fəaliyyəti barədə məlumat verdi, habelə Azərbaycanın İstanbulda və Türkiyənin Bakıda mədəniyyət mərkəzlərinin açılması təklifini irəli sürdü.

        Sonra Milli Məclisin deputatı, Azərbaycan Prezidenti Heydər Əliyevin fərmanı ilə yaradılmış Atatürk Mədəniyyət Mərkəzinin direktoru Nizami Cəfərov böyük Atatürkün irsinin araşdırılmasısahəsində görülən işlərdən danışdı, bu araşdırmaların nəticələrinin Atatürk ensiklopediyası”na daxil ediləcəyini bildirdi.

        Ömər İzgi dəyərli təkliflərə görə çıxış edənlərə minnətdarlığını bildirərək dedi ki, mədəniyyət mərkəzlərinin açılması məsələsi tez bir zamanda həll olunmalıdır.

        Görüşdə iki ölkənin parlamentləri arasında əməkdaşlığın bəzi məsələlərinə dair geniş fikir mübadiləsi aparıldı.

                               X                             X                             X

   TÜRKİYƏ BÖYÜK MİLLƏT MƏCLİSİNİN  SƏDRİ ÖMƏR İZGİ MİLLİ MƏCLİSDƏ   ÇIXIŞ ETMİŞDİR

        Elə həmin gün Türkiyə Böyük Millət Məclisinin sədri Ömər İzgi Milli Məclisin ümumi iclasında iştirak etmişdir.

        Milli Məclisin sədri Murtuz Ələsgərov türkiyəli həmkarını deputatlar adından salamlayaraq, Ömər İzgi ilə keçirilmiş görüşlər barədə məlumat verdi vədeputatları Böyük Millət Məclisi sədrinin tərcümeyi-halı ilə tanış etdi.

        Sonra Murtuz Ələsgərov Türkiyə-Azərbaycan münasibətlərinin inkişafı məsələləri üzərindəətraflı dayandı. Bir daha xatırladıldı ki, Türkiyə rəhbərliyi Atatürkün ideyalarına sadiq qalaraq Azərbaycanın dövlət müstəqilliyini birinci tanımışlar. Ölkələrimizin qardaşlıq, münasibətlərinin dərinləşməsində dövlət başçılarının qarşılıqlı səfərləri mühüm rol oynayır. Azərbaycan Prezidenti Heydər Əliyev dəfələrlə Türkiyədə səfərdə olmuş, bu ölkənin dövlət xadimləri və parlament nümayəndələri ilə görüşlər keçirmişdir. Bu görüşlər zamanı ikitərəfli əməkdaşlığın hüquqi bazasını müəyyənləşdirən mühüm sənədlər imzalanmışdır. 2001-ci ilin martında  Prezident Heydər Əliyev Türkiyə Böyük Millət Məclisində çıxış edərək, Türkiyə-Azərbaycan münasibətlərinin inkişafının gələcək perspektivlərini əsaslandırmışdır. Dövlət başçılarının sıx əlaqələri nəticəsində Türkiyə ilə Azərbaycan arasında münasibətlər strateji tərəfdaşlıq səviyyəsinə çatmışdır.

        Sonra TürkiyəBöyük Millət Məclisinin sədri Ömər İzgi deputatlar qarşısında çıxış etdi. O, Azərbaycanın dövlət müstəqilliyinin 10-cu ildönümü münasibətilə Milli Məclisin deputatlarını təbrik edərək bildirdi ki, bu dövr ərzində qardaş Azərbaycan Respublikası Prezident Heydər Əliyevin  rəhbərliyi altında dövlətçiliyin möhkəmləndirilməsi, sabitliyin bərqərar olması və bazar iqtisadiyyatına keçid sahəsində böyük uğurlar qazanmış, beynəlxalq təşkilatların tamhüquqlu üzvü olmuş, dünya birliyində layiqli yer tutmuşdur. Bu ilin yanvar ayında Türkiyədə ölkələrimiz arasında diplomatik münasibətlər yaradılmasının 10 illiyi dətəntənəli surətdə qeyd edilmişdir. 

Ömər İzgi ölkələrimizin parlamentləri arasında gündən-günə daha da inkişaf edən əməkdaşlıqdan məmnunluq duyduğunu söyləyərək dedi ki, qanunvericilik orqanlarımızın nümayəndələri Türkiyənin və Azərbaycanın mövqelərini beynəlxalq təşkilatlarda birgə qorumaq, o cümlədən Avropa Şurasında dövlətlərimizin ünvanına yönəldilmiş əsassız ittihamlarla əlaqədar etirazlarını bildirmək üçün səylərini bundan sonra da birləşdirməlidirlər. O, uydurma “erməni soyqırımı”nın tanınması haqqında Fransa senatının qərarını pisləyən xüsusi bəyanat qəbul etdiklərinə görə Milli Məclisin deputatlarına təşəkkürünü də bildirdi.

Türkiyə parlamentinin sədri Dağlıq Qarabağ probleminin nizama salınması məsələsinə toxunaraq dedi ki, Azərbaycanın tərəqqisi yolunda başlıca maneə məhz Ermənistanla olan münaqişədir. Ömər İzgi bəyan etdi ki, Türkiyə Böyük Millət Məclisinin mövqeyi belədir: münaqişənin həllinin Azərbaycanın ərazi bütövlüyü prinsipinə zidd olan hər hansı variantı qeyri-məqbuldur.

Türkiyə Böyük Millət Məclisinin sədri iqtisadi münasibətlərin inkişaf etdirilməsi məsələlərindən də danışdı. O, nəzərə çarpdırdı ki, türk biznesmenlərinin Azərbaycanda gördükləri işlərin həcmi yüz milyonlarla dollara bərabərdir. Ölkəmizdə fəaliyyət göstərən Türkiyə şirkətləri təxminən 40 min azərbaycanlını işlə təmin etmişlər. Türkiyə-Azərbaycan müştərək iqtisadi komissiyasının ikinci iclasının bu yaxınlarda imzalanmış protokolu qarşılıqlı surətdə faydalı iqtisadi əlaqələrin daha da genişlənməsinə imkan verəcəkdir.

Ömər İzgi Bakı-Tbilisi-Ceyhan neft kəməri tikintisinin böyük əhəmiyyətindən danışaraq vurğuladı ki, bu layihənin gerçəkləşdirilməsi Azərbaycan neftinin qərbə ixracı ilə yanaşı, Qafqazı Avropa ilə birləşdirəcək Şərq-Qərb  dəhlizinin yaradılmasında mühüm amil olacaqdır.

Türkiyə parlamentinin sədri çıxışının sonunda Milli Məclisin üzvlərinə müraciət edərək dedi ki, müdrik Azərbaycan xalqı genişmiqyaslı dəyişikliklər dövründə öz qüvvəsinin mənbəyini görkəmli siyasi xadim, Azərbaycanda demokratiyanın təminatçısı olan Prezident Heydər Əliyevdə görür. Mən ölkənizin xoşbəxt gələcəyinə inanıram, Türkiyə isə, öz növbəsində, sizə bütün çətinliklərin aradan qaldırılmasında kömək göstərəcəkdir.

Türkiyə Böyük Millət Məclisi sədrinin çıxışı deputatlar tərəfindən böyük maraqla dinlənildi və dəfələrlə alqışlarla qarşılandı.

                    X              X             X

                TÜRKİYƏ VƏ AZƏRBAYCAN PARLAMENTLƏRİ  SƏDRLƏRİNİNMƏTBUAT KONFRANSI

        Milli Məclisin   iclasları arasındakı fasilədə Türkiyə Böyük Millət Məclisinin sədri Ömər İzginin və Azərbaycan parlamentinin sədri Murtuz Ələsgərovun mətbuat konfransı olmuşdur. 

        Parlamentlərin sədrləri mətbuat nümayəndələrini salamlayaraq, ikitərəfli münasibətlərin öncül məsələləri üzərindəətraflı dayandılar. Onlar səfər zamanı keçirilmiş görüşlərin nəticələrini də yüksək qiymətləndirdilər.

        Ömər İzqi parlamentlərarası münasibətlərin gələcək inkişafı barədə jurnalistlərin suallarına cavab verərək bildirdi ki, türkdilli  ölkələrin parlamentlərinin mühüm məsələlərdə fəaliyyətini əlaqələndirəcək  Parlament Assambleyasını yaratmaq sahəsində iş gedir.

        Sonra parlament sədrləri Qafqaz regionunda sabitlik yaradılması, Türkiyə və Azərbaycan arasında siyasi və iqtisadi əlaqələrin möhkəmləndirilməsi ilə bağlı suallara cavab verdilər.

                                               X     X     X

    TÜRKİYƏ BÖYÜK MİLLƏT MƏCLİSİNİN SƏDRİ ÖMƏR İZGİ AZƏRBAYCAN QAÇQINLARI İLƏ               GÖRÜŞMÜŞDÜR

        Həmin gün Türkiyə Böyük Millət Məclisinin sədri Ömər İzgi Səttarxan adına zavodun tikintisi yarımçıq qalmış inzibati binasında yerləşdirilmiş qaçqın-köçkünlərlə görüşmüşdür.

        Cənab İzgi və onun xanımı zavodun ərazisində qoyulmuş vaqonlara gələrək, burada yaşayan ailələrin yaşayış şəraiti ilə tanış oldular.

        Söhbət zamanı baş nazirin müavini, Dövlətqaçqınkomun sədri Əli Həsənov Ermənistanın torpaqlarımızın zəbt olunmasına yönəldilmiş təcavüzkar siyasətindən danışdı. O, həmçinin dedi ki, son 15 ildə Azərbaycanda baş vermiş bütün faciəli hadisələrin kökündə Mixail Qorbaçovun Qarabağı Azərbaycandan qoparıb, Ermənistana birləşdirməyə yönəldilmiş siyasəti durmuşdur. Bu siyasətin həyata keçirilməsində başlıca maneə o vaxtlar Moskvada işləyən Heydər Əliyev idi. Onun istefasından sonra Qorbaçov erməni millətçilərinə verdiyi vədləri həyata keçirməyə başladı. 1988-ci ilin Sumqayıt hadisələri, sonra isə 1999-cu ilin 13-14 yanvar Bakı hadisələri Qorbaçovun göstərişi ilə DTK tərəfindən təşkil olunmuşdu və məqsəd azərbaycanlıları dünya ictimaiyyətinə vəhşilər kimi təqdim etmək idi.

        Ermənistanın təcavüzü nəticəsində Dağlıq Qarabağ ətrafındakı 7 rayon işğal edilmiş, yüz minlərlə insan ev-eşiyindən didərgin salınmışdır. Əsrlərlə müasir Ermənistanın ərazisində yaşamış azərbaycanlılar da döğma ocaqlarından qovulmuşlar.

Türkiyə parlamentinin başçısı Azərbaycanın öz ərazi bütövlüyünün bərpasına yönəldilmiş haqlı tələblərini dəstəklədiyini bildirərək vurğuladı ki, Türkiyə Azərbaycanın mövqeyini beynəlxalq səviyyədə həmişə müdafiə edəcəkdir.

Sonra Ömər İzginin adından qaçqınlara humanitar yardım paylandı.

Görüşdə Milli Məclis sədrinin birinci müavini Arif Rəhimzadə, Azərbaycanın Ankaradakı səfiri Məmməd Əliyev, Türkiyənin Bakıdakı səfiri Ünal Çeviköz iştirak edirdilər.

                               X              X              X

AZƏRBAYCANIN BAŞ NAZİRİ ARTUR RASİZADƏ İLƏ      GÖRÜŞÜ

        Elə həmin gün Türkiyə Böyük Millət Məclisinin sədri Ömər İzgi Azərbaycanın baş naziri Artur Rasizadə ilə görüşmüşdür.

        Baş nazir qonağı salamlayaraq vurğuladı ki, Azərbaycan qardaş Türkiyə ilə siyasi və iqtisadi əlaqələrin inkişafına həmişə xüsusi əhəmiyyət vermişdir. Ölkələrimiz bir çox iqtisadi layihələri həyata keçirir, bunların arasında enerji daşıyıcıları ilə bağlı layihələr əsas yer tutur. Bakı-Tbilisi-Ceyhan əsas ixrac neft kəmərinin və Bakı-Tbilisi-Ərzurum qaz kəmərinin tikintisinə dair məsələlər artıq həll edilmişdir. Türkiyənin bir çox iş adamları Azərbaycan iqtisadiyyatının müxtəlif sahələrinə sərmayə qoyurlar. Azərbaycanın iş adamları da Türkiyədə öz bisneslərini uğurla inkişaf etdirirlər.

        Səmimi görüş üçün minnətdarlıq edən Türkiyə parlamentinin sədri bildirdi ki, enerji layihələrinin həyata keçirilməsi iki qardaş xalqın daha da yaxınlaşması üçün faydalı olacaqdır. Bu layihələrin həm iqtisadi, həm də regionda sabitliyin bərqərar edilməsinə köməyi baxımından siyasi  əhəmiyyəti vardır.

        Görüşdə Türkiyənin ölkəmizdəki səfiri Ünal Çeviköz, Azərbaycanın Türkiyədəki səfiri Məmməd Əliyev iştirak edirdilər.