ABŞ BAĞDADDA QALA-SƏFİRLİK TİKİR
AZƏRTAC xəbər verir ki, Britaniyanın “Qardian” qəzetinin yazdığına görə, ABŞ Bağdadda əsl qalanı xatırladan səfirlik binası tikir. Səfirlik İraq paytaxtında hökumət idarələrinin və xarici nümayəndəliklərin yerləşdiyi və ciddi mühafizə olunan “Yaşıl zona”da yerləşəcəkdir.
Binanın tikintisi üçün təxminən Vatikanın ərazisinə bərabər - 42 hektar sahə ayrılmışdır. İnşa olunması nəzərdə tutulan 27 binada 615 nəfər yerləşəcəkdir.
Qalın divarlar və örtüklər bomba və mərmi zərbələrinə dözümlü olacaqdır. Əməkdaşlar kiçik otaqlarda, səfir xüsusi mühafizə olunan 1500 kvadratmetrlik, müavini isə 890 kvadratmetrlik ayrıca evlərdə yaşayacaqlar.
Səfirliyin öz su və elektrik təchizatı sistemi olacaqdır. Kompleksi sentyabr ayında təhvil vermək planlaşdırılır. İlin sonunadək isə səfirliyin əməkdaşları işə başlayacaqlar.
Qəzetin yazdığına görə, 300 milyon dollara başa gələcək yeni diplomatik nümayəndəlik ən böyük və bahalı səfirlik binası olacaqdır.
Hazırda Amerika diplomatları əvvəllər Səddam Hüseynə məxsus olmuş saraylardan birində yerləşmişlər. Şərhçilərin fikrincə, bu, yerli əhaliyə mənfi təsir göstərir, sanki onlar diktatorun yerini tutmuşlar.
Lakin yeni nümayəndəlik binalarının tikintisi bu münasibəti çətin dəyişə bilər. ABŞ-ın İraqdakı keçmiş səfiri Edvard Pek demişdir: “Daha bu nə səfirlik oldu ki, diplomatlar mərmilərdən qoruyan qalın divarlar arxasında gizlənəcək, dəbilqə qoyacaq və qum torbalarının arxasında gizlənəcəklər?”.
Bölmənin digər xəbərləri
