AZƏRTAC “Vaşinqton Tayms” qəzetinə istinadla xəbər verir ki, ABŞ Təhsil Nazirliyi ölkənin ümumtəhsil məktəblərində siniflərin formalaşdırılmasına dair federal qaydalarda dəyişikliklər etmək qərarına gəlmişdir. İndi yerli hakimiyyət orqanları yalnız qızların və ya oğlanların təhsil aldığı siniflər, hətta məktəblər yarada bilərlər. ABŞ təhsil naziri Marqaret Spellinq demişdir: “Apardığımız tədqiqatlar təsdiq etmişdir ki, cinsi əlamətlər əsasında yaradılmış siniflərdə oxuyan şagirdlərin bilik səviyyəsi daha yüksək olur. ABŞ-da hər bir şagirdin öz imkanlarından maksimum istifadə etməsi üçün şərait yaradılmalıdır. Hər ştat bu şəraiti necə təmin etmək yolunu özü müəyyənləşdirir”.
Yeni qaydaların tətbiqi nazirliyin ekspertlərinin 4 il ərzində apardıqları tədqiqatların nəticəsidir. Tədqiqatlar zamanı təhsilin səmərəsinin öyrənilməsi ilə yanaşı, yeni qanunun 1972-ci ildə qəbul edilmiş və təhsil proqramlarında cinsi əlamətlərə görə ayrı-seçkiliyin qadağan olunduğu “Title IX” düzəlişinə uyğun gəlib-gəlməməsi yoxlanılmışdır.
ABŞ Baş prokuroru Alberto Qonzales təzə qaydaların qanuniliyini təsdiq etmişdir.
