ABŞ-DA ONLAYN-UNİVERSİTET AÇILMIŞDIR
Bakı, 20 may (AZƏRTAC). Xarici KİV-lərin məlumatına görə, ABŞ-da kasıblar üçün beynəlxalq onlayn-universitet açılmışdır. “University of the People” adlı bu qeyri-adi tədris ocağında tələbələr yalnız 15 ABŞ dollarından başlayaraq qəbul haqqı ödəməli və 10 dollardan başlayaraq sessiya dövrünə görə ödəniş aparmalıdırlar. Kasıb ölkələrin əhalisi bundan az məbləğ ödəyir.
Bu ideyanın müəllifi və onlayn-universitetin prezidenti israilli sahibkar Şai Reşefin sözlərinə görə, məqsəd sosial şəbəkə platformasını təhsilin ehtiyaclarına yönəltməkdir. Yalnız internetdə fəaliyyət göstərən yeni universitetdə artıq 35 ölkədən 150 nəfər qeydiyyatdan keçmişdir. Müəllif 4 ildə tələbələrin sayını 15 minə çatdırmaq niyyətindədir. Hələ ki, onlayn tədris ocağında yalnız iki ixtisas üzrə təhsil almaq mümkündür. Bunlar ingilis dilində biznes-idarəetmə və kompyuter texnologiyaları ixtisaslarıdır. Şəbəkə universiteti Kaliforniyanın Pasadena şəhərində qeydiyyatdan keçmişdir. Ş.Reşef öz universitetinin ABŞ-da akkreditə olunmasını planlaşdırır ki, onun diplomlarına rəsmi status verilsin.
Bölmənin digər xəbərləri
