ABŞ EKSPERTLƏRİ TƏDQİQATI BAŞA ÇATDIRMIŞLAR
AZƏRTAC İTAR-TASS-a istinadla xəbər verir ki, ABŞ-ın raketgən müdafiə (RM) Agentliyinin ekspertləri Çexiyada radiolokasiya stansiyasının (RLS) yerləşdirilməsi üçün təklif olunan yerin ətraflı tədqiqini başa çatdırmışlar. Praqadan 90 kilometr cənub-qərb tərəfdə Mişov yaşayış məntəqəsinin yaxınlığında yerləşən Brdı poliqonunun qərb hissəsində ötən dörd gün ərzində radiolokasiya texnologiyası, ekologiya, geologiya, hidrologiya, nəqliyyat və tikinti sahəsində 30 amerikalı mütəxəssis işləmişdir.
Çexiya Müdafiə Nazirliyinin rəsmi nümayəndəsi Andrey Çirtekin jurnalistlərə verdiyi məlumatda deyilir ki, yaxın su hövzələrindən torpaq və su nümünələri götürülmüşdür. Ekspertlər həmin yerdə topoqrafik tədqiqatlar da aparmış və RLS-in tikintisi üzrə işlərin smetasını tərtib etmək üçün təkliflər də hazırlamışlar.
Corc Buşun radarın yerləşdirilməsi planlarının ən sanballı tənqidçilərindən birinə - Çexiya hökumətində müxalifət lideri, sosial-demokrat İrji Paroubekə göndərdiyi məktubun mətni Çexiya KİV-lərində yayılmışdır. Ağ evin başçısı məktubunda deyir: “Amerika xalqı Çexiya Respublikası vətəndaşları ilə möhkəm ittifaqı qiymətləndirir. Biz birlikdə sülhü möhkəmləndirə, planetdə firavanlığı və azadlığı genişləndirə bilərik”.
Bölmənin digər xəbərləri
