ABŞ-ın neft istehsalı azalır
Bakı, 4 fevral, AZƏRTAC
Birləşmiş Ştatların sutkalıq xam neft hasilatı azalıb.
AZƏRTAC ABŞ-ın Enerji İnformasiya Administrasiyasının (EIA) məlumatına istinadla xəbər verir ki, ötən hesabat həftəsində Birləşmiş Ştatların neft istehsalı 1000 barrel azalaraq gündəlik orta hesabla 11 milyon 408 min barrel səviyyəsində olub.
Keçən həftə ABŞ-ın neft idxalı əvvəlki həftəyə görə 1,4 milyon barrel artaraq sutkalıq 6,5 milyon barrel, neft ixracı da əvvəlki həftə ilə müqayisədə 128 min barrel çoxalaraq gündəlik 3,48 milyon barrel təşkil edib.
EIA-nın proqnozuna görə, cari ildə Birləşmiş Ştatların neft hasilatının gündəlik 11,1 milyon barrel, gələn il isə 11,5 milyon barrel olacağı gözlənilir.
Xatırladaq ki, ötən il fevralın 22-28-ni əhatə edən həftədə ABŞ-ın neft hasilatı sutkada orta hesabla 13,1 milyon barrelə çataraq rekord səviyyəyə yüksəlmişdi.
ABŞ 2018-ci ilin noyabrında Səudiyyə Ərəbistanı və Rusiyanı geridə qoyaraq dünyanın ən böyük neft istehsalçısı olub.
Bölmənin digər xəbərləri
