Gəncə, 26 mart, Rauf Hacıyev, AZƏRTAC

Azərbaycanın həm də “xalqlar muzeyi” adlandırıldığını bilirdim. Lakin ölkəmizdə nə vaxtsa almanların yaşadığı və onların burada böyük bir mədəniyyət yaratdıqları barədə məlumatım yox idi. “Ölkəmizi tanıyaq” tur-aksiyasının üçüncü günü biz Göygöl şəhəri ilə tanış olduq. Tanışlıq zamanı bizə bildirdilər ki, bu şəhərin əsası Almaniyadan ölkəmizə gələn koloniyaçılar tərəfindən qoyulub.

Bu sözləri AZƏRTAC-a müsahibəsində “Ölkəmizi tanıyaq” tur-aksiyanın iştirakçısı, Abşeron rayonu Saray qəsəbə 2 saylı tam orta məktəbin IX sinif şagirdi Səbuhi Bayramov bildirib.

O deyib : “Göygöl şəhərində bizi mehriban və olduqca şən qarşıladılar. Şəhərin mahnı və rəqs kollektivlərinin üzvləri maraqlı musiqi proqramı ilə çıxış etdilər. Konsert proqramı o qədər maraqlı hazırlanmışdı ki, biz özümüz də rəqqaslara qoşulduq və onlarla birlikdə rəqs etdik. Hətta iştirakçılardan bir neçəsi ana Vətənimiz haqqında şeirlər söylədi.

Sonra Heydər Əliyev Mərkəzində Ulu Öndərin həyat və fəaliyyətini əks etdirən muzeylə tanış olduq. Burada bizə Göygölün tarixi və son illər şəhərdə aparılan geniş quruculuq işləri barədə ətraflı məlumat verildi. Mərkəzlə tanışlıqdan sonra yoldaşlarımla birlikdə ətrafdakı geniş parkda gəzdik, dağlara doğru açılan füsunkar mənzərəni seyr etdik”.

Şəhərlə bağlı səfər təəssüratlarını bölüşən məktəbli deyib: “Sonra Göygölün səliqə ilə cərgə-cərgə düzülən açıq eyvanlı, aynabəndli, çatmatağlı evlərin yanından ötüb koloniyaçılar tərəfindən tikilən alman lüteran kilsəsinə yollandıq. Bələdçilər bizə məlumat verdilər ki, hazırda həmin binada Göygöl Tarix-Diyarşünaslıq Muzeyi fəaliyyət göstərir. Muzeydə Göygöl şəhərinin tarixini və alman koloniyaçılarının izlərini xatırladan çoxsaylı eksponatlara baxdıq”.

“Göygöl şəhərində getdiyimiz sonuncu məkan Bayraq meydanı və Azərbaycan Rəmzləri Muzeyi oldu. Tur-aksiya iştirakçılarına məlumat verildi ki, Bayraq meydanı və muzey binası şəhərin ən hündür təpəsi üzərində inşa olunub. Buradan ətrafa olduqca xoş mənzərə açılırdı. Arxada zirvəsi qarlı Kiçik Qafqaz dağları, qarşıda isə göylərə ucalan xan çinarların altında cərgə-cərgə sıralanan qırmızı kirəmitli alman evləri, Avropa memarlıq üslubunda inşa olunan kilsə və səliqəli küçələr mənə və yoldaşlarıma sanki bu gözəl şəhərin tarixini danışırdı”,-deyə o bildirib.