ABŞERON TİBB İŞÇİLƏRİNƏ HƏDİYYƏ
AZƏRTAC xəbər verir ki, bu gün Abşeron sakinlərinin sağlamlığının keşiyində 800-ə yaxın tibb işçisi dayanmışdır. Onlar ölkəmizdə hər il iyunun 17-də qeyd edilən peşə bayramlarını bu dəfə də yeni əmək uğurları ilə qarşılamışlar.
Tibb işçilərinin peşə bayramı münasibətilə Mehdiabad qəsəbəsində və Güzdək kəndində yeni ambulatoriyaların açılışı olmuşdur. Abşeron Rayon İcra Hakimiyyətinin başçısı Zakir Fərəcov tədbir iştirakçılarını bu əlamətdar hadisə münasibətilə təbrik edərək bildirmişdir ki, son 3 ildə rayondakı bütün dövlət tibb müəssisələri əsaslı təmir edilmiş, yeni avadanlıqlar və müasir mebel ilə təchiz olunmuşdur. Təcrübəli həkimlər və yüksək ixtisaslı tibb işçiləri əhalinin sağlamlığının keşiyində dayanmışdır. Bu illərdə ölkənin yüksək dövlət mükafatlarına layiq görülmüş 60 nəfər Abşeron sakini arasında əyinlərində ağ xalat olan adamlar da var. Bu, dövlətimizin başçısı İlham Əliyevin ölkədə səhiyyə sisteminin inkişafına və tibb işçilərinin əməyinə böyük diqqətinin təsdiqidir.
Z.Fərəcov daha sonra vurğulamışdır ki, rayonun bütün klinika və ambulatoriyalarının görkəmi yeniləşmişdir, qış fəslində yerli müasir qazanxanaların köməyi ilə bu binalar qızdırılır, fasiləsiz olaraq su, qaz və elektrik enerjisi ilə təchiz olunur. Rayonun tibb müəssisələrinin maddi-texniki bazası nəzərəçarpacaq dərəcədə möhkəmlənmişdir. Respublika Səhiyyə Nazirliyi onlar üçün müxtəlif profilli yeni və müasir tibb aparatları və avadanlıqlar ayırmışdır. Bir sözlə, rayon əhalisinə vaxtında və keyfiyyətli tibbi yardım göstərilməsi üçün əlverişli şərait yaradılır.
Yeni tibb obyektlərinin istifadəyə verilməsi mərasimində bayram münasibətilə xüsusi fərqlənmiş tibb işçilərinə Abşeron Rayon İcra Hakimiyyətinin fəxri fərmanları təqdim edilmişdir.
Rəmzi qırmızı lent kəsiləndən sonra mərasimin qonaqları, o cümlədən Bakı Şəhər Səhiyyə Şöbəsinin müdiri Leyla Seyidbəyli, Mehdiabad qəsəbə bələdiyyəsinin daxili ehtiyatları hesabına tikilmiş tibb müəssisəsi ilə tanış olmuşlar. Ambulatoriyanın smeta dəyəri təqribən 400 min manatdır. Burada həkimlərin işləməsi üçün gözəl şərait yaradılmışdır. Geniş və işıqlı ixtisaslaşdırılmış kabinetlər, laboratoriya və qeydiyyat şöbəsi qəsəbənin 22 min sakininə vaxtında və keyfiyyətli tibbi yardım göstərməyə imkan verir. Ambulatoriyanın ikimərtəbəli binasının ətrafındakı meydan da abadlaşdırılmışdır.
######
Bölmənin digər xəbərləri
