DÜNYA
Adolf Hitlerin fransız qadınından oğlu var imiş
Paris, 18 fevral (AZƏRTAC). Almaniya tarixindən, İkinci Dünya Müharibəsindən bəhs edənlər, üçüncü reyxin başçısı Adolf Hitlerin tərcümeyi-halını araşdıranlar alman faşizmi diktatorunun heç vaxt evlənmədiyi və özündən sonra vərəsəsi olmadığı barədə yekdil fikrə gəlmişlər. Həyatını bütünlüklə Almaniyanın dünyanı zəbt etməsi kimi sərsəm ideyaya həsr edən keçmiş yefreytorun qadınlara tamamilə biganə münasibət bəslədiyi, kədərli vaxtlarında öz dərdini yalnız yaxınlıq etdiyi silahdaşı Göbbelsin xanımı Eva ilə bölüşdürdüyü bir çox kitab və məqalələrdə öz əksini tapmışdır.
Amma bu yaxınlarda parisli vəkilin açıqlaması Hitlerin sonsuz olması barədə formalaşmış fikirləri alt-üst etmişdir. Vəkil Fransua Jibolt Lore bildirmişdir ki, bir gün ofisində olarkən bir nəfər ona yaxınlaşaraq soruşmuşdur: “Cənab, mən Hitlerin oğluyam. Deyin, indi mən nə etməliyəm?”. Eşitdiklərinə inanmayan vəkil əvvəlcə bu adamın dəli olduğunu zənn etmişdir. Lakin onun qarşısında qətiyyən dəliyə oxşamayan hündürboylu, heç bir ləhcə hiss olunmadan təmiz fransız dilində danışan bir nəfər dayanmışdır. Onun danışdıqları az həqiqətə bənzəyirdi...
Alman ordusunun kapralı kimi hərbi xidmətdə olan Adolf Hitler 1914-cü ildə Almaniyanın Fransaya qarşı apardığı müharibənin iştirakçısı olmuşdu. Həmin dövrdə almanlar artıq Fransa ərazisinin bir hissəsini işğal etmişdi. Sakit vaxtlarda alman əsgərləri əylənmək üçün Lil şəhəri yaxınlığındakı balaca bir qəsəbəyə baş çəkirdilər. Hitler 16 yaşlı Şarlot Lobjua adlı qızla burada tanış olur.
Şarlot Hitlerlə tanışlığı barədə belə demişdir: “Bir neçə gün mən başqa qadınlarla birlikdə quru otu tayalara vurarkən bir alman əsgərinin küçənin əks tərəfində rəsm çəkdiyini gördük. Hamımız sakit təbiətli bu almana maraq göstərirdik. Onun qəribə baxışları var idi. O bizimlə dostcasına, mehriban hərəkət edirdi”.
Qadın Hitlerlə tez-tez gəzintiyə çıxdıqlarını yaxşı xatırlayırdı. 1917-ci ildə bardan dostu ilə yüksək əhval-ruhiyyə ilə qayıdan Adolf Hitler Şarlot ilə daha yaxın əlaqədə olur. Bir ildən sonra onların bir oğlu dünyaya gəlir. Kənd uşaqlarının Jan-Mari adı verilən bu uşağa nifrət bəsləmələrini onların baxışlarından oxumaq olurdu. Jan-Mari çox vaxt evə sifəti göyərmiş və qançır olmuş vəziyyətdə gələrdi.
İllər ötürdü. Şarlot oğlunun atasının kim olduğunu bir sirr kimi saxlayır, bu haqda suala cavab verməkdən boyun qaçırırdı. Oğluna nifrət edən Şarlot onu vaxtilə bacısının qulluqçuluq etdiyi bir sonsuz ailəyə övladlığa verir. Uşaq böyüdükcə yeni anasından özü haqda məlumatlar alır.
50-ci illərin başlanğıcında ölümündən bir qədər əvvəl Şarlot oğluna əsl həqiqəti açıb söyləyir və atasının kim olduğunu bildirir.
Jan-Mari Lore 1981-ci ildə çap etdirdiyi kitabında bu xəbərdən şok vəziyyətinə düşdüyünü, ağır həyat tərzi keçirdiyini, heç vaxt məzuniyyət götürmədiyini, 20 il ərzində bir dəfə də olsun kinoteatra getmədiyini acı-acı xatırladır.
1970-ci illərdə artıq ailə quran və bir neçə uşaq atası olan Jan-Mari əsl həqiqəti üzə çıxarmağa cəhd göstərir. O, Almaniyadakı məşhur Heydelberq klinikasında qanını yoxlatdırarkən Hitlerin qan qrupu ilə eyniyyət təşkil etməsi aşkar olunur. Hətta onların şəkilləri arasında oxşarlıq da həmin andaca diqqəti cəlb edir. Anasının ölümündən sonra üzərində “Adolf Hitler” sözləri yazılmış anasına məxsus bəzi əşyaların üzə çıxması onun həqiqətən Hitlerin oğlu olduğunu təsdiq edir. Jan-Marinin özü də vaxtilə anasının Almaniyadan qızıl və digər qiymətli əşyalar aldığını yaxşıca xatırlayır.
1979-cu ildə vəkilin Hitlerin fransız qadınından olan oğlu barədə kitabı çap edildikdən sonra Jan-Mariyə diqqət birdən-birə artmış və o, Fransanın yüksək dairələrinin əziz qonağı olmuşdur. İkinci Dünya müharibəsində Almaniya ilə bir ittifaqda olan Yaponiya da Hitlerin oğlunun tapılmasına biganə yanaşmamış və onunla isti münasibətlər yaratmışlar.
Əsgər Əliyev
AZƏRTAC-ın xüsusi müxbiri
Paris