AEBA-nın baş direktoru Ukraynada səfərdədir
Vyana, 29 mart, AZƏRTAC
Atom Enerjisi üzrə Beynəlxalq Agentlik (AEBA) Ukraynaya atom elektrik stansiyalarının təhlükəsizliyinin təmin olunmasında dəstək göstərəcək.
AZƏRTAC xəbər verir ki, bu məqsədlə beynəlxalq qurumun baş direktoru Rafael Qrossi Ukraynaya səfər edib və müvafiq addımları Ukrayna rəsmiləri ilə müzakirə edəcək.
Agentliyin saytında bildirilib ki, səfər çərçivəsində nüvə obyektlərinin operativ təhlükəsizliyinin təmin olunması üçün təcili texniki yardım müzakirə ediləcək.
R.Qrossi qeyd edib ki, hərbi münaqişə Ukraynanın atom elektrik stansiyalarını və radioaktiv materialı olan digər obyektlərini görünməmiş təhlükə qarşısında qoyur: “Biz onların təhlükəsiz fəaliyyətini davam etdirə bilmələri və həm Ukraynada, həm də onun hüdudlarından kənarda sağlamlığa və ətraf mühitə ciddi təsir göstərə biləcək nüvə qəzası riskini azaldılmasını təmin etmək üçün təcili tədbirlər görməliyik”.
Səfər çərçivəsində R.Qrossinin Ukraynada AES-lərdən birinə baş çəkəcəyi də gözlənilir. Texniki yardım proqramı, eyni zamanda, Ukraynaya nüvə ekspertləri və müvafiq materialların göndərilməsini nəzərdə tutur.
Elgün Niftəli
AZƏRTAC-ın xüsusi müxbiri
Vyana
Bölmənin digər xəbərləri
