AfD-nin Saksoniya-Anhalt əyalət seçkisində qələbəsi Avropada narahatlıq yaradıb
Berlin, 7 sentyabr, AZƏRTAC
Almaniyanın Saksoniya-Anhalt əyalətində sağçı populist Almaniya üçün Alternativ (AfD) partiyasının seçkidə qələbəsi ölkə hüdudlarından kənarda da geniş əks-səda doğurub. Fransada və Polşada nəticə narahatlıqla qarşılanıb, bir sıra Avropa ölkələrindəki sağçı partiyalar isə AfD-ni təbrik edib.
İtaliyanın Baş nazirinin müavini, “Lega” partiyasının lideri Matteo Salvini AfD-ni Saksoniya-Anhaltdakı qələbəsi münasibətilə təbrik edib. Avstriyanın sağçı FPÖ partiyasının lideri Herbert Kikl nəticəni demokratik güc nümayişi adlandırıb. Macarıstanın keçmiş Baş naziri Viktor Orban da AfD-ni təbrik edərək, nəticələri Almaniya və Avropa üçün “möhtəşəm” adlandırıb və bunun hələ başlanğıc olduğunu vurğulayıb.
Polşanın Baş naziri Donald Tusk isə AfD-nin qələbəsinə sevinənləri sərt tənqid edib. “Polşada yalnız axmaqlar və ya xainlər Almaniyada AfD-nin qələbəsinə sevinə bilərlər”, - deyə o, X sosial şəbəkə hesabında bildirib.
İspaniyanın Baş naziri Pedro Sançes AfD-nin uğuruna Avropada ekstremizmin yayılması ilə bağlı sərt xəbərdarlıqla reaksiya verib. “Ekstremist təhlükə Avropada və dünyada daha çox yayılır və bu, əsasən ənənəvi sağçıların təslim olması sayəsindədir”, - deyə o Madriddə vurğulayıb.
Fransanın maliyyə naziri Roland Leskur seçkinin nəticəsini çox narahatedici siqnal kimi qiymətləndirib. İtaliyanın xarici işlər naziri Antonio Tajani isə bunu “çox pis xəbər” adlandıraraq, nəticənin yalnız yerli xarakter daşıyacağına ümid etdiyini deyib.
AfD-nin qələbəsinə Amerika Birləşmiş Ştatlarından da diqqətçəkən reaksiya gəlib. Texnologiya milyarderi Elon Musk AfD lideri Alis Vaydelin qələbə paylaşımına “Yaxşı bacardınız” (Gut gemacht!) şərhini yazıb. AfD-nin Saksoniya-Anhalt üzrə lider namizədi Ulrix Ziqmund isə Elon Maska təşəkkür edərək, partiyasının hakimiyyətə gələcəyi təqdirdə, onunla güclü və konstruktiv əməkdaşlıq qurmaq istədiyini bildirib. O, Almaniyanın belə bir halda investisiyalar üçün yenidən cəlbedici məkan olacağını qeyd edib.
Almaniyanın Kansleri Fridrix Merts də partiyası olan Xristian Demokratlar Birliyinin (CDU) toplantısındakı çıxışında nəticələrin gözlənilməz və şokedici olduğunu, CDU-nun son illərdə ən ağır məğlubiyyətlərindən birinə uğradığını etiraf edib. “Dünən təkcə Saksoniya-Anhaltda deyil, bütün Almaniyada vəziyyət dəyişib”, - deyə Kansler diqqətə çatdırıb.
Xatırladaq ki, 15 siyasi partiyanın qatıldığı seçkidə AfD 43,8 faiz səslə qələbə qazanaraq əyalət parlamentindəki 83 deputat mandatından 39-na sahib olub. Kansler Mertsin partiyası – CDU 17,2 faizlə ikinci olub. Sosial Demokratlar Partiyası 9,3, Yaşıllar Partiyası 8,9, Sol Partiya 8,6 faiz səs toplayıb. Sahra Vaqenknext İttifaqı 5,3 faiz səs yığa bilib. İndiyədək əyalət hökumətində təmsil olunan Azad Demokratlar Partiyası isə 2,6 faiz səslə əyalət parlamentinə daxil olmaq üçün tələb edilən həddi keçə bilməyib.
Bölmənin digər xəbərləri
