AFİNADA OLİMPİYA KƏNDİ AÇILDI

30.07.2004 [17:04]
Çap et
A⁺ A^-

AZƏRTAC Olimpiya Təşkilat Komitəsinin mətbuat üçün məlumatına istinadla xəbər verir ki, iyulun 29-da Afinada Olimpiya kəndinin açılış mərasimi olmuşdur. Mərasim “Afina-2004” Təşkilat Komitəsi nümayəndələrinin və Beynəlxalq Olimpiya Komitəsi məmurlarının iştirakı ilə keçirilmişdir. Qarşıdakı Oyunların ilk idmançıları artıq burada məskunlaşmağa başlamışlar.

Olimpiya Təşkilat Komitəsinin sədri İoanna Angelopulu-Daskalaki demişdir: “Yunanıstan Olimpiya kəndinin tikilməsi vəzifəsinin öhdəsindən uğurla gəldi. Çoxları hesab edirdi ki, ölkəmiz bu işi görməyə qadir deyildir. Lakin biz bu işi layiqincə yerinə yetirdik. Bizim gücümüzə inanmayanlara Olimpiada günlərində cavab verəcəyik”.

Avqustun 13-dən 29-dək Olimpiya kəndində milli komandaların 16 min üzvü və onları müşayiət edən şəxslər yaşayacaqlar.