Ağdaban faciəsi yad edilib
Bakı, 8 aprel, Zərəngiz Mansurova, AZƏRTAC
Erməni işğalçıları tərəfindən Kəlbəcər rayonunun Ağdaban kəndində törədilən qanlı faciənin 23 ili tamam olur.
AZƏRTAC xəbər verir ki, bununla əlaqədar “Aşıq Şəmşir” Mədəniyyət Ocağı İctimai Birliyində anma mərasimi keçirilib.
Birliyin sədri Qəmbər Şəmşiroğlu erməni separatçılarının Azərbaycan xalqına qarşı törətdiyi dəhşətli soyqırımılarından söhbət açıb. Qeyd olunub ki, xüsusi qəddarlıqla həyata keçirilən bu soyqırımılarından biri 1992-ci il aprelin 8-də Kəlbəcərin Ağdaban kəndində törədilib. Bu qanlı cinayət bütöv bir kəndin tamamilə yandırılması, yüzlərlə dinc sakinə qeyri-insanı işgəncələr verilməsi, onların amansızlıqla qətlə yetirilməsi, yurdundan didərgin salınması ilə nəticələnib.
Çıxış edənlər bildiriblər ki, 23 il əvvəl erməni quldurları qəflətən 130 evdən ibarət Ağdabana soxularaq kəndı iri çaplı silahlardan atəşə tutublar. Qarşılarına çıxan hər kəsi öldürüb, evləri yandırıblar. Kəndin 779 nəfər dinc sakininə qeyri-insani işgəncələr verilib, 67 nəfər qətlə yetirilib, 8 nəfər qoca, 2 azyaşlı uşaq, 7 qadın diri-diri odda yandırılıb, 12 nəfərə xüsusi qəddarlıqla ağır bədən xəsarəti yetirilib, 2 nəfər itkin düşüb.
Mərasimdə yurd-yuvasından didərgin salınmış Kəlbəcər məktəblilərinin ifasında düşməni lənətləyən şerlər səsləndirilib, ədəbi-bədii kompozisiya nümayiş olunub.
Bölmənin digər xəbərləri
