Bakı, 1 fevral, AZƏRTAC

Dövlət Neft Fondunun (ARDNF) sərmayələri, xüsusilə səhm kapitalı sektorunda mövcud imkanlar üçün İtaliya Azərbaycanın strateji tərəfdaşdır.

AZƏRTAC xəbər verir ki, bu sözləri “Agenzia Nova” informasiya agentliyinin nümayəndəsinin də iştirak etdiyi bir qrup italyan jurnalistlə görüşündə ARDNF-in icraçı direktorunun müavini İsrafil Məmmədov bildirib.

“2019-cu il üçün bizim məqsədimiz gəlirləri maksimallaşdırmaq və itkiləri minimuma endirməklə sərmayələri şaxələndirməkdir”, - deyə 1999-cu ilin dekabr ayında Prezident Heydər Əliyev tərəfindən yaradılmış və cari il 20 illiyini qeyd edən Neft Fondunun icraçı direktorunun müavini qeyd edib.

O deyib ki, İtaliya istifadə edilməmiş imkanlara malikdir. Azərbaycan qanunvericiliyinə əsasən, ARDNF Azərbaycanın özəl sektoruna sərmayə qoya bilməz. İtaliya isə Azərbaycanın suveren neft fondunun sərmayələr üçün üstünlük verdiyi məkanlardan biridir. Biz İtaliyanın Əmanət və Kreditlər Fondu daxil olmaqla strateji fonduna sərmayə yatırırıq. Lakin fond bazarına və dövlət borclarına da sərmayələr qoyuruq. ARDNF-in İtaliyada sərmayələrinin həcmi təqribən 600 milyon dollar (noyabr 2018-ci il) təşkil edir. Biz uzunmüddətli bir fonduq və İtaliyanı özəl səhmlər üçün əla bazar olaraq görürük. ARDNF 20 illiyi münasibətilə sentyabr və oktyabr ayları arasında Dünya Bankının iştirakı ilə beynəlxalq konfrans təşkil etməyi nəzərdə tutur. Bu, yalnız mənfəət əldə etmək üçün deyil, eyni zamanda, gələcək nəsillərə yönəlmiş bir fəaliyyətdir.

1994-cü ildə “Əsrin müqaviləsi”nin imzalanmasından başlayaraq ARDNF-in yaradılmasına gətirib çıxaran addımlardan danışan İ.Məmmədov vurğulayıb ki, ARDNF xüsusi məsuliyyət daşıyır. Onun fəaliyyətini müəyyənləşdirən 3 istiqamət var: ölkədə makroiqtisadi sabitliyinin qorunmasını təmin etmək, sosial-iqtisadi inkişaf üçün dövlət layihələrini dəstəkləmək və gələcək nəsillərə sərmayə qoymaq. ARDNF neftdən gələn gəlirlərin idarə edilməsinə məsul fonddur və cari portfeli 38,5 milyard dollardır. Ən önəmli xərclərdən biri Dağlıq Qarabağ münaqişəsi zamanı məcburi köçkün vəziyyətinə düşmüş insanların dəstəklənməsinə yönəlib, bu məqsədlə ötən illər ərzində 2,4 milyard manat ayrılıb. Digər xərclər Bakı-Tbilisi-Ceyhan neft kəməri və Bakı-Tbilisi-Qars dəmir yolu xətti ilə bağlıdır. Bundan əlavə, xaricdə təhsil almaq istəyən tələbələrə dəstək olmaq üçün təqaüdlər verilib.

Digər dövlət fondlarından, misal üçün, Mərkəzi Banka məxsus olan Norveç Fondundan fərqli olaraq ARDNF ayrıca hüquqi şəxsdir. ARDNF-in vəsaitlərinin xərclənməsi hər il müvafiq proseduralardan keçərək təsdiq olunur. Bu prosesdə parlament və bir sıra qeyri-hökumət təşkilatları da iştirak edir. Eyni zamanda, onun fəaliyyəti audit sistemi vasitəsilə yoxlanılır. ARDNF şəffaf fəaliyyətinə görə fərqlənir və bu xüsusda, BMT tərəfindən tanınıb (2007-ci ildə BMT Fondu tərəfindən təltif olunub). Truman Fondu tərəfindən aparılmış araşdırmaların nəticələrinə görə, Azərbaycan şəffaflıq üzrə Norveç, Yeni Zelandiya və ABŞ-dan sonra dördüncü ölkədir.