İDMAN
“AHİT” İB-in sədri Nadir Əliyev: Azərbaycan idmanının gələcəkdə daha çox inkişaf edəcəyinə əminik
Bakı, 19 noyabr, AZƏRTAC
Müasir, müstəqil Azərbaycanda bütün sahələr kimi, bədən tərbiyəsi və idmanın inkişafı da dövlətin daim diqqət mərkəzindədir. Təsadüfi deyil ki, ölkəmiz həm də dünyanın qabaqcıl idman dövlətlərindən biri kimi tanınır. Bu inkişafa idman cəmiyyətləri, klub və birliklər öz töhfələrini verirlər. “Gənclik”, “Məhsul”, “Spartak”, “Zenit”, “Qarabağ” idman cəmiyyətlərini və “Atilla”, “Pəhləvan”, “Şahmat və dama”, “Alpinist və turist” idman klublarını özündə birləşdirən Azərbaycan Həmkarlar İttifaqları İdman Təşkilatları İctimai Birliyinin (AHİT İB) fəaliyyəti bu baxımdan mühüm əhəmiyyət kəsb edir.
AHİT İB idman təşkilatlarının əhatə etdiyi sahələr üzrə məqsədyönlü tədbirlər həyata keçirir
AHİT İB-in sədri Nadir Əliyev idman qurumunun fəaliyyəti, üzv təşkilatların əldə etdikləri nailiyyətlərlə bağlı AZƏRTAC-a müsahibə verib. O qeyd edib ki, AHİT İB idman təşkilatlarının əhatə etdiyi sahələr üzrə işçilərin və onların ailə üzvlərinin kütləvi bədən tərbiyəsi-sağlamlıq idman tədbirlərinə cəlb olunması, idman növlərinin inkişafı ilə bağlı məqsədyönlü tədbirlər həyata keçirir. Eyni zamanda, müxtəlif növlər üzrə yarışların təşkilinə kömək etmək, milli komandalarda həmkarlar ittifaqlarının idmançılarının daha çox sayda təmsil olunması, onların hazırlığı, beynəlxalq yarışlarda uğurla çıxış etməsinə nail olmaq üçün bir sıra işlər görür.
“AHIT İB Azərbaycan Həmkarlar İttifaqları Konfederasiyasının bilavasitə rəhbərliyi altında Gənclər və İdman Nazirliyi, Milli Olimpiya Komitəsi ilə sıx əməkdaşlıq əsasında fəaliyyətini davam etdirərək konkret tədbirlərin həyata keçirilməsinə və müəyyən nailiyyətlərin əldə edilməsinə nail olub. Gənc idmançıların hazırlığı ilə 9 uşaq-gənclər idman məktəbi, o cümlədən 1 ixtisaslaşdırılmış olimpiya ehtiyatı və 8 kompleks uşaq-gənclər idman məktəbləri məşğul olurlar. Başa çatmaqda olan il idman qurumu üçün uğurlu olub”, - deyə o, əlavə edib.
Pəhləvanlarımızın nailiyyətləri xüsusilə diqqətəlayiqdir
Nadir Əliyev bu ilin ötən on ayı ərzində “Zenit” İdman Cəmiyyətinin üzvlərinin beynəlxalq və respublika yarışlarında 62 medal qazandıqlarını, onlardan 18-nin dünya idman arenalarında əldə edildiyini bildirib: “Sərbəst güləşçimiz Cəbrayıl Həsənovun (79 kq) nailiyyətini xüsusi qeyd edərdim. Rio-de-Janeyro Yay Olimpiya Oyunlarının bürünc medalçısı bu il dünya kubokunda gümüş, dünya və Avropa çempionatlarında, müvafiq olaraq, gümüş və bürünc medal qazanıb. Digər istedadlı güləşçimiz Turan Bayramov (65 kq) bu il dünya, Avropa birinciliklərində və Yeniyetmələrin Yay Olimpiya Oyunlarında qızıl medala sahib olub”.
“Atilla” İdman Klubunun təmsilçilərinin uğurlarından danışan N.Əliyev qeyd edib ki, klubun yetirmələri Avropa kuboku və çempionatlarında 5 qızıl, 3 gümüş, 4 bürünc medal qazanıblar. O, eyni zamanda, “Məhsul” İdman Cəmiyyəti və “Pəhləvan” İdman Klubunun təmsilçilərinin dünya və Avropa çempionatlarında əldə etdikləri nailiyyətlərdən də söhbət açıb.
Təhsil müəssisələrində idmanın kütləviliyi təmin edilir
N.Əliyev ötən 10 ay ərzində “Şahmat və Dama” İdman Klubunun 18 yetirməsinin beynəlxalq və respublika yarışlarında mükafata layiq yerlər tutduğunu bildirib. O, 25 ali və 15 orta ixtisas təhsil müəssisələrinin tələbələrini sıralarında birləşdirən “Gənclik” Tələbə İdman Cəmiyyətinin (TİC) fəaliyyətini də qeyd edib. Dərs ilinin başlanması ilə “Gənclik” TİC-in də idman tədbirlərinə start verildiyini, spartakiada, universiada, birincilik və çempionatların ilkin mərhələsində yüzlərlə gəncin qüvvəsini sınadığı vurğulanıb. Bu ilin mart və may aylarında idmanın altı növü üzrə ali təhsil müəssisələrinin tələbələri arasında respublika çempionatlarının keçirildiyini, yarışlarda 19 ali təhsil müəssisəsindən ümumilikdə 325 tələbənin iştirak etdiyi diqqətə çatdırılıb.
Ötən il Çinin Taypey şəhərində keçirilən tələbələrin XXIX Yay Universiadasında yığma komandanın 3 qızıl, 1 gümüş, 4 bürünc medal qazandığını bildirən N.Əliyev tələbə idmançıların hazırda növbəti universiadaya hazırlaşdıqlarını da qeyd edib.
“Bu gün müstəqil Azərbaycanda bütün sahələrdə sürətli inkişaf baş verir. İdmanın inkişafına dövlət tərəfindən göstərilən yüksək diqqət və qayğı onu cəmiyyətimizin ayrılmaz hissəsinə, insanların həyat tərzinə çevirib. İnsanları həm fiziki cəhətdən sağlam edən, həm də mənəvi cəhətdən kamilləşdirən idmana marağın getdikcə artmasında bu amil mühüm rol oynayır. İndi təkcə paytaxt Bakıda deyil, respublikamızın hər bir bölgəsində, hətta ən ucqar bölgələrdə belə idmanla məşğul olmaq üçün şərait yaradılıb və bu iş yüksək səviyyədə davam edir. Əminik ki, gələcəkdə Azərbaycan idmanı daha böyük vüsət alacaq”, - deyə “AHİT” İB-in sədri bildirib.