Almaniya aeroportlarında başlayan tətil 110 min sərnişinə təsir göstərəcək
Bakı, 10 yanvar, AZƏRTAC
Bu gün Almaniyanın üç böyük hava limanında - Düsseldorf, Köln-Bonn və Stuttgart aeroportlarında təhlükəsizlik xidməti əməkdaşlarının birgünlük tətili başlayıb.
AZƏRTAC Almaniya KİV-lərinə istinadla xəbər verir ki, Verdi həmkarlar ittifaqının çağırışı ilə keçirilən tətil 110 minə yaxın sərnişinə təsir göstərə bilər. Aksiya artıq yanvarın 10-na keçən gecə problem yaratmağa başlayıb: Köln-Bonn aeroportunun buraxılış darvazası qarşısında yük avtomobillərinin uzun növbəsi yaranıb. Tətil səbəbindən Düsseldorf aeroportunda 350, Stuttgartda isə 125 aviareys ləğv olunub.
Həmkarlar ittifaqı təşkilatı təhlükəsizlik xidməti əməkdaşlarına saathesabı 20 avro ödənməsini tələb edir. İşəgötürən isə əməkhaqqının 6,4 faizədək artırılması təklifini irəli sürüb. Verdi bu təkliflə razılaşmayıb.
Tərəflər yanvarın 23-də yenidən danışıqlar masası arxasına keçəcək. Bu dəfə də razılıq əldə olunmasa, həmkarlar ittifaqının bütün ölkə ərazisində və daha uzunmüddətli tətil çağırışı etməsi gözlənilir.
Bölmənin digər xəbərləri
