“Amazon” daha 14 min əməkdaşını işdən çıxaracaq
Bakı, 23 yanvar, AZƏRTAC
Dünyanın ticarət nəhənglərindən biri – “Amazon” kompaniyası daha bir işçi ixtisarını planlaşdırır.
AZƏRTAC “Reuters” agentliyinə istinadla xəbər verir ki, bu, təxminən 30 min nəfəri əhatə edən ikinci ixtisardır. “Amazon” ötən ilin oktyabrında da 14 min əməkdaşını işdən çıxarmışdı. Budəfəki ixtisarların internet xidmətləri, pərakəndə satış, “Prime Video” və insan resursları sahələrində aparılması gözlənilir.
Agentlik qeyd edir ki, haqqında söhbət gedən 30 min iş yeri “Amazon”un 1,58 milyon işçisinin yalnız kiçik bir hissəsidir. 2022-ci ildə şirkət təxminən 27 min iş yerini ixtisar etmişdi.
Son vaxtlar dünyanın hər yerində şirkətlər işçi ixtisarlarının tempini sürətləndirib. Məsələn, sentyabr ayında Amerika şirkətlərində çalışan 25 mindən çox insan işsiz qalıb. İlin əvvəlində “UPS” logistika kompaniyası təxminən 50 min nəfərin işdən çıxarıldığını elan edib. Avropada isə işdən çıxarılanların sayı 20 mini ötüb.
Bölmənin digər xəbərləri
