AMEA Beynəlxalq Elmi Şuranın Baş Assambleyasının iclasında təmsil olunub
Bakı, 6 fevral, AZƏRTAC
Oman Sultanlığının paytaxtı Maskat şəhərində Beynəlxalq Elmi Şuranın (ISC) 3-cü Baş Assambleyası və Maskat Qlobal Bilik Dialoqu keçirilib. Tədbir Oman Baş nazirinin beynəlxalq əlaqələr və əməkdaşlıq məsələləri üzrə müavini və Əlahəzrət Sultanın şəxsi nümayəndəsi Seyid Əsəd bin Tariq Əl Səidin himayəsi altında Ali Təhsil, Tədqiqat və İnnovasiya Nazirliyinin ev sahibliyi ilə reallaşıb.
Tədbirə 132 ölkədən elmlər akademiyaları, milli tədqiqat şuraları, elm fondları, müvafiq dövlət qurumlarının rəhbərləri və nümayəndə heyətləri, həmçinin beynəlxalq elmi cəmiyyətlər, assosiasiyalar və birliklərin nümayəndələrindən ibarət 415 iştirakçı qatılıb. AMEA tərəfindən Rəyasət Heyəti aparatının Xarici əlaqələr və beynəlxalq elmi təşkilatlarla iş şöbəsinin müdiri dosent Esmira Əlirzayeva iştirak edib.
Bu barədə AZƏRTAC-a AMEA-dan məlumat verilib.
Tədbirdə elmin bütün sahələrini əhatə edən ISC üzvləri arasında beynəlxalq elmi əlaqələr üzrə problemlərin və prioritetlərin, fənlərarası əməkdaşlıq imkanlarının müzakirəsinə geniş yer ayrılıb. Proqrama “Elmdə azadlıq, məsuliyyət və inklüzivlik”, “Süni intellekt”, “Elmi transformasiya: açıq elm, tədqiqatların qiymətləndirilməsi, elmi nəşrlər”, “Elmə güvənin artırılması”, “Elmi diplomatiya”, “Beynəlxalq elm gündəliyinin təyini” və digər kimi mövzular daxil edilib.
Sessiyalardan biri “Davamlı inkişaf siyasətində və praktikasında sosial elmlərin rolunun artırılması” mövzusuna həsr edilib. Məruzələr və müzakirələr zamanı sosial elmlərin təbiət elmləri və cəmiyyət arasında əlaqələrdə, elmi nailiyyətlərin transferi istiqamətində mərkəzi mövqe tutduğu diqqətə çatdırılıb. Bu sahədə mövcud problemlər, yeniliklər və perspektivlərə dair müxtəlif ölkələrin təcrübələri, ISC-nin növbəti mərhələlərdə fəaliyyəti üzrə fikir mübadiləsi aparılıb.
Esmira Əlirzayeva müzakirələr zamanı çıxış edib və təkliflərini səsləndirib.
Baş Assambleya çərçivəsində strateji plan layihəsi və prioritet sahələr üzrə əməkdaşlıq imkanları, ISC-nin növbəti mərhələlərdə fəaliyyət istiqamətləri, alimlərin mübadiləsi üçün viza prosesləri ilə bağlı çətinliklər ətraflı müzakirə edilib.
Tədbirdə, həmçinin ISC-nin prezidenti professor Piter Qlukman və icraçı direktoru professor Salvatore Ariconun iştirakı ilə keçirilən ISC-nin regional ofislərinə dair sessiyada yeni ofisin təsisi üzrə geniş müzakirələr aparılıb və müxtəlif regional əlaqələndiricilərin məruzələri dinlənilib. Esmira Əlirzayeva AMEA-nın beynəlxalq əlaqələri, həyata keçirdiyi layihə müsabiqələri, elmi prioritetləri haqqında məlumat verib, regional ofislərin fəaliyyəti ilə əlaqəli təkliflərini diqqətə çatdırıb.
İclas çərçivəsində AMEA ilə bir sıra ölkələrin elmi qurumları, beynəlxalq elmi təşkilatlarla əməkdaşlıq məsələləri də müzakirə edilib.
Oman tədbirində Almaniyanın Karlsruhe Texnologiya İnstitutunun professoru, ISC-nin ilk katibi olmuş həmyerlimiz professor Alik İsmayılzadə də iştirak edib və ISC-nin Qərar Komissiyasının üzvü seçilib.
Qeyd edək ki, ISC 150-dən çox ölkədən 250-dən artıq akademiya, elmi birlik, milli və beynəlxalq elmi təşkilatı özündə birləşdirir. AMEA 2022-ci ildən bu təşkilatın tamhüquqlu üzvüdür və ISC-nin İdarə Heyətinin seçkilərində və müxtəlif tədbirlərdə fəal iştirak edir.
Bölmənin digər xəbərləri
