Bakı, 7 fevral, P.İmanova, AZƏRTAC

Fevralın 7-də Azərbaycan Milli Elmlər Akademiyası (AMEA) Rəyasət Heyətinin növbəti iclası keçirilib.

AZƏRTAC xəbər verir ki, əvvəlcə AMEA-nın prezidenti, akademik Akif Əlizadə gündəlikdəki məsələləri diqqətə çatdırıb.

Sonra AMEA-nın Humanitar Elmlər Bölməsinin (HEB) akademik-katibi, akademik Teymur Kərimlinin bölmənin 2017-ci ildəki elmi və elmi-təşkilati fəaliyyəti haqqında məruzəsi dinlənilib. Bildirilib ki, ötən il bölmə üzrə 33 problemin 83 mövzusu, 363 işin 186 mərhələsi üzrə tədqiqat işləri aparılıb. İlin sonunda 122 işin 109 mərhələsinin başa çatdığını deyən akademik bölmənin elmi müəssisələri tərəfindən səkkiz respublika və dörd beynəlxalq miqyaslı tədbirin keçirildiyini söyləyib. Qeyd edilib ki, yeddisi xaricdə olmaqla 129 kitab, səkkizi xaricdə olmaqla 101 monoqrafiya, 234-ü xaricdə olmaqla 2.108 məqalə və 35-i xaricdə olmaqla 168 tezis çap edilib. Bölmə əməkdaşlarının impakt faktorlu jurnallarda 24 məqaləsi dərc edilib, bu elmi əsərlərə 76 dəfə istinad olunub. Hesabat ilində fəlsəfə doktorluğu üzrə 38, elmlər doktorluğu üzrə yeddi nəfər müdafiə edib.

T.Kərimli Azərbaycan Respublikası Prezidentinin 2017-ci ilin “İslam Həmrəyliyi İli” elan edilməsi ilə bağlı müvafiq sərəncamının icrası, eləcə də respublikada bu hadisənin ictimai-siyasi, beynəlxalq və ideoloji əhəmiyyətini təbliğ etmək məqsədilə bölmənin elmi müəssisələrinin səfərbər olaraq bir sıra təqdirəlayiq işlər gördüyünü deyib. 2017-ci ilin MDB məkanında “Ailə ili” elan olunması ilə əlaqədar Humanitar və İctimai Elmlər bölmələrinin birgə təşkilatçılığı ilə “Ədəbiyyatda və incəsənətdə multikulturalizm və tolerantlıq” mövzusunda elmi sessiyanın və akademik Akif Əlizadənin sərəncamına əsasən HEB-in akademik-katibi, akademik Teymur Kərimlinin layihəsi üzrə AMEA-da “Ana dilimiz - milli varlığımızdır” müsabiqəsinin keçirildiyini bildirib.

Hesabatda Rəyasət Heyətinin qərarlarının və AMEA-nın prezidentinin sərəncamlarının icrası, struktur dəyişiklikləri, keçirilən konfrans, sessiya, simpozium, seminar və yubileylər, təltiflər, xarici ezamiyyət və digər məsələlərə də toxunulub. Bölmənin bəzi elmi müəssisələrinin Türkiyə, Çin, İran, Misir, Rusiya, Özbəkistan və Qazaxıstanın tanınmış universitetləri, elmi-tədqiqat müəssisələri ilə əlaqələr qurduğu bildirilib.

Məruzə dinlənildikdən sonra müzakirə aparılıb və hesabat təsdiqlənib. Bölmə üzrə mühüm elmi nəticələr AMEA-nın illik hesabatına daxil edilib. Multidissiplinar tədqiqatların aparılması istiqamətində humanitar elmlərin başqa elm sahələri ilə əlaqələrini möhkəmləndirmək, əməkdaşların dünyanın aparıcı ölkələrinin qrant layihələrində iştirakını intensivləşdirmək və digər məsələlərə dair tapşırıqlar verilib.

Rəyasət Heyətinin növbəti qərarı ilə AMEA Hüseyn Cavidin Ev Muzeyinin strukturunda qismən dəyişiklik edilib. Bundan başqa, AMEA-nın Geologiya və Geofizika İnstitutunun 80 illik yubileyinin keçirilməsi qərara alınıb.

İclasda bir sıra elmi-təşkilati və kadr məsələlərinə də baxılıb.