ELM VƏ TƏHSİL
AMEA-nın Humanitar Elmlər Bölməsi ötən ildəki fəaliyyətinə dair hesabat verib
Bakı, 10 fevral, AZƏRTAC
Azərbaycan Milli Elmlər Akademiyası (AMEA) rəyasət heyətinin fevralın 10-da keçirilən növbəti iclasında AMEA-nın Humanitar Elmlər Bölməsinin 2015-ci ilin yekunlarına dair hesabatı dinlənilib.
AZƏRTAC xəbər verir ki, hesabat ilində bölmədə yerinə yetirilən elmi və elmi-təşkilati işlər haqqında bölmənin akademik-katibi, akademik Teymur Kərimli məlumat verib.
Bildirilib ki, ötən il bölmənin müəssisələrində 31 elmi problemi əhatə edən 70 mövzu üzrə 353 tədqiqat işi aparılıb, 10 mövzu üzrə 182 iş tamamlanıb, 14 mühüm nəticə əldə edilib. Elmi müəssisələrin əməkdaşları altısı xaricdə olmaqla 57 monoqrafiya, 107 kitab nəşr etdiriblər. Ötən il 1.577 məqalə və 206 tezis çap olunub ki, onlardan 241-i xaricdə, o cümlədən 24-ü impakt faktorlu jurnallarda dərc edilib. Həmçinin, 33 dərslik və elmi-kütləvi ədəbiyyat nəşr olunub, elmi işçilərin əsərlərinə 94 istinad edilib.
Vurğulanıb ki, bölmə üzrə 24 fəlsəfə doktoru, üç elmlər doktoru dissertasiyası müdafiə edilib, 22 fəlsəfə və beş elmlər doktoru dissertasiyası müdafiə ərəfəsindədir. Hazırda bölmənin institutlarının doktoranturasında 45-i əyani, 87-si qiyabi olmaqla 132 nəfər təhsil alır.
Fundamental elmlə təhsilin qarşılıqlı əlaqəsindən danışan akademik Teymur Kərimli vurğulayıb ki, Ədəbiyyat İnstitutunda yaradılmış Bakı Slavyan Universitetinin Azərbaycan ədəbiyyatının baza kafedrası öz işini uğurla davam etdirib. Ötən il üç nəfər qədim yunan, sanskrit və latın dilləri ixtisasları üzrə AMEA-nın Nəsimi adına Dilçilik İnstitutunun magistraturasına qəbul olunub.
Akademik AMEA-nın 70 illik yubileyi ərəfəsində bölmə tərəfindən həyata keçirilən bir sıra mühüm işləri də diqqətə çatdırıb. Qeyd edilib ki, AMEA-nın vitse-prezidenti, akademik İsa Həbibbəylinin ssenarisi əsasında “Azərbaycanın elm məbədi” sənədli film çəkilib. Bölmənin yeni saytı heb.science.az istismara verilib.
Bölmənin 2015-ci ildəki elmi və elmi-təşkilati fəaliyyəti qənaətbəxş hesab olunub. Hesabat məruzəsi müzakirə olunduqdan sonra AMEA-nın illik hesabatına daxil edilməsinə dair qərar verilib.