AMEA-nın Naxçıvan Bölməsində Bəxtiyar Vahabzadəyə həsr olunan elmi konfrans keçirilib
Naxçıvan, 1 may, AZƏRTAC
AMEA-nın Naxçıvan Bölməsində “Poeziyamızın Bəxtiyar Vahabzadə zirvəsi” mövzusunda elmi konfrans təşkil olunub.
Bölmənin mətbuat xidmətindən AZƏRTAC-ın bölgə müxbirinə bildirilib ki, AMEA-nın Naxçıvan Bölməsinin sədri, akademik İsmayıl Hacıyev tələbələrin təşkil etdiyi elmi tədbirin Azərbaycan Respublikası Prezidentinin “Bəxtiyar Vahabzadənin 100 illik yubileyinin qeyd edilməsi haqqında” 21 fevral 2025-ci il tarixli Sərəncamının icrası çərçivəsində keçirildiyini deyib.
Akademik diqqətə çatdırıb ki, milli ədəbiyyatımızın görkəmli nümayəndəsi, Xalq şairi, ictimai xadim, akademik Bəxtiyar Vahabzadə təkcə Azərbaycanda deyil, ölkə sərhədlərindən kənarda da tanınmış istiqlal şairidir. Yaradıcılığı bütövlükdə milli şüura xidmət edən şair yurd, millət, azadlıq sevgisini şeirlərində ustalıqla ifadə etməyi bacarmışdır.
İsmayıl Hacıyev təcrübəçi tələbələrin B.Vahabzadə irsinə diqqətini və təşəbbüskar yanaşmasını yüksək qiymətləndirib, konfransın işinə uğurlar arzulayıb.
İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev rəhbərlik etdiyi elmi-tədqiqat müəssisəsində təcrübəçi tələbələrin cəlb olunduğu fəaliyyətdən söz açıb.
Professor bədii-ictimai fikir tarixinə əsl ziyalı mövqeyi, milli birliyin tərənnümçüsü kimi daxil olmuş şairin əsərlərində əksini tapan türkçülük ideyası, ana dilinə sevgi məsələsindən danışıb. Alim bildirib ki, Bəxtiyar Vahabzadə ana dilinin saflığı və qorunması uğrunda mübarizə aparan milli təəssübkeş olmuşdur.
Sonra təcrübəçi tələbələr Xuraman Yusifzadə “İstiqlal şairi Bəxtiyar Vahabzadə”, Nərmin Abbasova “Bəxtiyar Vahabzadənin “Gülüstan poeması”, Nərgiz Əliyeva “Bəxtiyar Vahabzadə yaradıcılığında sevgi lirikası” mövzusunda məruzələrini təqdim ediblər. Məruzələrdə şairin Azərbaycan ədəbiyyatındakı yeri, onun poeziyasında vətəndaşlıq mövqeyi, milli-mənəvi dəyərlərə sadiqliyi və Azərbaycançılıq ideyalarının təbliğindəki xidmətləri vurğulanıb.
Bəxtiyar Vahabzadə şeirlərində xalq, millət, vətən mövzusundan bəhs olunub, şairin əsərlərində əksini tapan azadlıq ideyası onun həyat eşqinin təzahürü kimi səciyyələndirilib. “Gülüstan” poeması haqqında düşüncələrin təhlil olunduğu məruzələrdə əsərin oxucuda yaratdığı təəssüratlara diqqət çəkilib, əsər tarix, vətənpərvərlik və poeziyanın vəhdəti kimi dəyərləndirilib. Şairin əsərlərindən gətirilən nümunələr bədii təsvir və ifadə vasitələri baxımından təhlil edilib.
Sonda tələbələrdən İnci Cəfərova, Təhminə Məmmədova və Jalə Hüseynova şairin “Nədən oldu”, “Ömür”, “Bir salama dəymədi” şeirlərini söyləyiblər.
Bölmənin digər xəbərləri
