Bakı, 27 sentyabr, AZƏRTAC

Azərbaycanın ən yeni tarixi təkcə xalqımızın gələcək rifahını təmin edən hadisələrlə deyil, həmçinin Qafqaz regionunda yaşayan digər xalqların sülh və təhlükəsiz yaşamını şərtləndirən əhəmiyyətli hadisələrlə zəngindir.

Bunu AZƏRTAC-a müsahibəsində AMEA Tarix və Etnologiya İnstitutunun böyük elmi işçisi Ramin Əlizadə deyib. Tarixçi alim ən yeni tariximizdə baş vermiş hadisələrin ən möhtəşəminin şəhidlərimizin və qazilərimizin qanı və canı hesabına Qarabağın işğaldan azad edilməsi nəticəsində qazanılmış böyük Zəfər olduğunu söyləyib:

“Böyük Zəfərin ilk günü nə baş verdi? Həmin gün təxribata əl atan düşmənin əsl məqsədi nə idi? Niyə Qarabağın və Şərqi Zəngəzurun 30 ilə yaxın işğal dövründə dünya mətbuatı baş verən hadisələrə ciddi münasibət göstərmirdi? Bu suallara cavab vermək üçün öncə bir məsələni xüsusilə vurğulamalıyam ki, düşmən böyük Zəfərin memarı olan Ali Baş Komandanın planlarından xəbərsiz idi. Reallığı əks etdirən bu fakt düşmənin bütün hiylələrini ifşa etmək üçün həm döyüş meydanında, həm də dünyanın nüfuzlu media vasitələrində təbliğat sahəsində qələbənin əldə olunması üçün mühüm şərt idi. Məhz bunun nəticəsində 2020-ci il sentyabrın 27-də düşmənin təxribatına layiqli cavab verildi. Həmin gün Ermənistan silahlı bölmələri növbəti dəfə hücum əməliyyatına başladı. Düşmənlə təmas xətti müxtəlif istiqamətlərdə iri və xırda çaplı silahlardan atəşə tutuldu. Düşmənin təxribatçı hərəkətləri əvvəllər olduğu kimi, yenə yalnız bir məqsədə xidmət edirdi: dünya ictimaiyyətinin nəzər-diqqətini çaşdırmaq, işğalçı olduğu halda işğala məruz qalmış tərəfin haqqına girmək. 2020-ci ilin payızında 44 günlük Vətən müharibəsinin ilk günündən başlayaraq döyüş əməliyyatlarının sonunadək Ermənistan hakim dairələri işğalçı dövlət olduqlarını gizlətmək üçün hər yola əl atdılar. Nəticə isə özgəsinin torpağını işğal yolu ilə özünə “vətən” etmiş düşmən ordusunun darmadağın edilməsi oldu”.

Ramin Əlizadə bildirib ki, vətənini sevən, onun uğrunda şəhidlik məqamını seçən igid övladların sayəsində bütün dünya ədalətin zəfər qazanmasına şahid oldu: “Buna görə də Prezident İlham Əliyevin 2020-ci il dekabrın 2-də imzaladığı Sərəncamla sentyabrın 27-si Azərbaycan Respublikasında Anım Günü kimi təsis edildi. Bu, ölkəmizin ərazi bütövlüyü uğrunda canlarını fəda etmiş bütün şəhidlərimizin xatirəsinə dərin ehtiramın ifadəsidir”.