MƏDƏNİYYƏT
Aprel şəhidi polkovnik-leytenant Sənan Axundovun xatirəsi anılıb
Bakı, 25 iyul, AZƏRTAC
Azərbaycan Müdafiə Nazirliyinin tabeliyində olan Həzi Aslanov adına Ordu İdeoloji və Mədəniyyət Mərkəzidə aprel döyüşlərində həlak olmuş, polkovnik-leytenant Sənan Axundovun xatirə gecəsi keçirilib.
AZƏRTAC xəbər verir ki, xatirə gecəsində, Əməkdar mədəniyyət işçisi, Prezident təqaüdçüsü Zəminə Xınalının Sənana Axundova həsr etdiyi miniatür “Müqəddəs şəhid” kitabının təqdimatı olub. Bu dəfə keçirilən xatirə gecəsinin bir səbəbkarı isə Sənan Axundovun oğlu Tahir Axundovun yüksək balla Azərbaycan Tibb Universitetinin hərbi tibb fakültəsinə qəbul olunması idi.
Görüşdə Azərbaycan Müdafiə Nazirliyinin rəsmi nümayəndələri ilə yanaşı, kursantlar, Milli Məclisin deputatları, Veteranlar şurasının üzvləri , Nərimanov rayon Ağsaqqallar Şurasının üzvləri, ziyalılar, şəhid ailələri iştirak ediblər.
Vətən uğrunda canından keçən şəhidlərimizin ruhu bir dəqiqəlik sükutla yad edildikdən sonra, Azərbaycan himni səslənib.
Tədbirdə Müdafiə Nazirliyinin Həzi Aslanov adına Ordu İdeoloji və Mədəniyyət Mərkəzinin rəisi, mayor İlkin Qayıbov Lələtəpə yüksəkliyi ərazisində minaya düşən polkovnik yoldaşını xilas edib, qəhrəmanlıqla vətən uğrunda şəhid olan Sənan Axundovun qısa, lakin şərəfli həyat yolundan danışıb. Onun Azərbaycan Milli Ordusunun zabiti kimi xarici ölkələrdə, Almaniyada Vətəni necə ləyaqətlə təmsil etdiyini, işlədiyi hərbi dairələrdə nüfuz qazandığını söyləyib. Qeyd edib ki, Sənan Axundov kimi bir qeyrətli insanın oğlu, yalnız Tahir Axundov kimi hərəkət edib, atasının bitirmədiyi yarımçıq yolunu davam etdirməliydi. Bildirib ki, bu gün Azərbaycan Ordusunda xidmət edən hərbçilər və veteranlar, şəhidin döyüş yoldaşları Tahir Axundovun yüksək balla hərbi həkim fakültəsinə qəbul olunmasını çox böyük sevinclə qarşılayıblar.
Vətən uğrunda döyüşlərdə həyat yoldaşı həlak olan şairə və publisist, hərbiçi Zəminə Xınalı Sənan Axundova həsr etdiyi poemadan danışaraq bildirib ki, o, Heydər Əliyev adına Ali Hərbi Məktəbi bitirib. Sənan hərbçi sənətinə yiyələnədə, onun həyat yoldaşı şəhid idi. Ona görə də şəhid ailələrinin, övladlarının keçirdikləri ağrı və acılar ona tanışdır. Sənan haqqında poema yazmağı isə özünə bir borc bilirdi. Artıq bu borcu da yerinə yetirdi.
Sənan Axundovun barəsində film nümayiş edildikdən sonra, Milli Məclisin deputatları Məlahət Həsənova, Sona Əliyeva çıxış etdilər. Milli Məclisin deputatları şəhidliyə ucalan vətən qəhrəmanlarının hər bir azərbaycanlının qəlbində xüsusi yeri olduğunu vurğulayıblar. Aprel döyüşlərinin şəhid və iştirakçılarını isə yeni Azərbaycan döyüş salnaməsinə yeni bir tarix yazdıqlarını söyləyiblər. Azərbaycan adlı bir dövlətin şəhid ailələrinə göstərdiyi qayğı və imtiyazlardan danışıblar.
Tədbirdə iştirak edən general mayor Fəxrəddin Cəbrayılov, ehtiyatda olan polkovnik , Milli Təhlükəsizlik Orqanları Birliyinin İdarə heyətinin üzvü Sücəddin Abdullayev isə xatirə gecəsində iştirak edən hər kəsi döyüşə səsləyib. Bildiriblər ki, Vətən torpaqıaının azad olunması məsələsində yubanmaq olmaz, şəhidlərimizin qanı tökülmüş torpaqlar bizi gözləyir.
Tədbirdə şəhidlər Əbdülməcid Axundovun, Zakir Cəfərovun, Əlzamin İslamovun, Mahir Quliyevin, Müşfiq Orucovun, Xaliq Əzizzadənin, Mahir Mirzəyevin valideynləri iştirak ediblər.
Şəhid ailələri adından çıxış edən Əbdülməcid Axundovun anası Tahir Axundovu şərəfli bir peşə seçməsi münasibətilə təbrik edib, bildirib ki, şəhidlərimizin ruhu o zaman sevinəcək ki, onların qanları tökülən torpaqlar azad olub, sahiblərinə qaytarılacaq. Bu işi də ancaq, Azərbaycan Milli Ordusu görməlidir.
Azərbaycan Mətbuat Şurasının sədr müavini Umud Mirzəyev anadan olduğu , işğal altında olan Aşağı Əbdürəhmanlı kəndi haqqında danışıb. Deyib ki, Sənan da onun doğulduğu ərazidəndir. Sənan öz torpaqlarını azad etmək üçün hərb yolunu seçmişdi: “Mən hər ayda bir neçə dəfə öz kəndimizin yaxınlığına gedirəm. Kəndimiz də şəhid olub. Viran olmuş yurd yerimizi kənardan ürək ağrısı ilə müşahidə edirəm. Artıq bu döyüşü başlayıb, bitirməyin vaxtıdır. Yoxsa ürək tab gətirmir... Bizim gənclərimiz informasiya məkanında fəal olmalı, bununla yanaşı hər biri vətəni azad etmək haqqında düşünməlidirlər. Bəli, Sənan kimi bir oğulun övladı, Tahir kimi olmalıydı. Başqa yolu yoxdur...”.
Aprel şəhidləri haqqında ikicildlik “Qalibiyyət: şahidlər və şəhidlər” kitabının müəllifi, jurnalist Aida Eyvazlı, Axundovlar ailəsi ilə tanışlığının ilk günündən danışdı : “Mən ilk dəfə Tahir Axundovu görəndə ona belə bir sual verdim: Tahir imtahanlara hazırlaşmaq çətindir, ya atasızlıq?”. Tahir dedi ki, atasızlıq ən çətin imtahandır. Bu gün Tahir həyatın bir imtahanından da üzüağ çıxdı. O hərbi həkim olacaq. Tahir söz verdiyi uğuru qazandı. Öz biliyi, əzmi ilə yüksək balla hərbi həkim olmaq yoluna çıxıbdır. Mən inanıram ki, harada olsa Vətənə xoş sorağı gələcək”.
Şəhid Sənan Axundovun həyat yoldaşı Nəcibə Axundova Azərbaycan dövlətinə ailəsinə və övladına, şəhidinə göstərdikləri qayğıya, diqqətə görə minnətdarlığını bildirib. Deyib ki, ən çətin anlarında dövləti öz yanında görüb. Azərbaycan Respublikasının Birinci vitse-prezidenti Mehriban Əliyevanın ailəsinə göstərdiyi xüsusi qayğı və diqqətdən danışıb. Bildirdi ki, Mehriban xanım Əliyevanın onlara bağışladığı evdə də Tahir həkim olandan sonra xoşbəxt bir ömür sürəcək.
Tədbirin sonunda Həzi Aslanov adına Ordu İdeoloji və Mədəniyyət Mərkəzinin musiqi kollektivinin konserti olub. Əməkdar artist Elnarə Abdullayeva və Yaqut Xəlizadə Vətəni, qəhrəmanlarımızı vəsf edən mahnılar oxuyublar. Zəminə Xınalı isə tədbirdə iştirak edənlərə Səmnan Axundova həsr etdiyi “Müqəddəs şəhid” kitabını hədiyyə edib.