REGİONLAR
Aqrar məşğulluğun artırılmasına xidmət edən “AMAL” layihəsi ilə bağlı dəyərləndirmə aparılıb
Bakı, 27 iyul, AZƏRTAC
İyulun 27-də Aqrar Məşğulluğun Artırılması Layihəsi (AMAL) çərçivəsində panel görüş keçirilib.
AZƏRTAC xəbər verir ki, tədbirdə çıxış edən kənd təsərrüfatı nazirinin müavini Sarvan Cəfərov gənclərin aqrar sektorda məşğulluq səviyyəsinin artırılması və regionlarda layiqli iş şəraitinin, o cümlədən aqrar sektorda rəqabətqabiliyyətli mühitin yaradılmasının, məhsuldarlığın artırılması məqsədilə icra edilən “AMAL” layihəsinin uğurla icrasının koordinasiyalı şəkildə səmərəli fəaliyyətinin nəticəsi olduğunu bildirib: “Hesab edirəm ki, əlaqəli fəaliyyətin və sıx kommunikasiyanın davam etdirilməsi müvafiq istiqamətlərdə inkişafı daha da sürətləndirəcək. Həmçinin gənclərin aqrar sektorda iştirak səviyyəsini artırmağa, fermerlərin yaradıcı və innovativ potensialının üzə çıxarılmasına və müasir informasiya-kommunikasiya texnologiyalarından səmərəli istifadəsinə töhfə verəcək”.
BMT-nin Ərzaq və Kənd Təsərrüfatı Təşkilatının (FAO) Azərbaycandakı Tərəfdaşlıq və Əlaqələndirmə Ofisi rəhbərinin müavini Bariz Mehdiyev “AMAL” layihəsinin icrası ilə əlaqədar müxtəlif dövlət qurumları ilə əməkdaşlıq edildiyini, koordinasiya sayəsində bu layihənin müsbət nəticələrlə yekunlaşdığını qeyd edib.
Kiçik və Orta Biznesin İnkişafı Agentliyinin İdarə Heyətinin sədri Orxan Məmmədov “AMAL” layihəsini regionlarda yaşayan və kənd təsərrüfatı ilə məşğul olan gənclərin bu sahədə biznes ideyalarının reallaşması və sosial vəziyyətinin yaxşılaşdırılmasına dəstək verən mühüm layihə adlandırıb. Bu layihənin gənclər arasında sahibkarlıq mühitinin stimullaşdırılması, yeni nəsil biznes təşəbbüslərinin dəstəklənməsi və gənc fermerlərin öz arzularını gerçəkləşdirməsi üçün aqrar sektorda əlverişli bir imkan yaratdığını deyən Orxan Məmmədov vurğulayıb ki, birgə fəaliyyət aqrar sahədə yeni nəsil fermerlərin inkişaf etməsi və gələcəkdə yeni layihələr üçün stimul yaradacaq.
Aqrar Kredit və İnkişaf Agentliyinin sədri Seymur Mövlayev tədbir iştirakçılarının diqqətinə çatdırıb ki, layihə ölkədə aqrar sektorda gənclərin iştirak səviyyəsinin artmasına, gənclərin təhsil və məşğulluq məsələlərinə diqqətin artırılmasına önəmli töhfələr verir.
Dövlət Məşğulluq Agentliyinin İdarə Heyətinin sədri Mustafa Abbasbəyli müasir dövrdə əmək bazarının transformasiyaya uğradığını, strukturunun dəyişdiyini, fermerlərin bu çağırışlara uyğunlaşmasının zəruri olduğunu qeyd edib. Kənd təsərrüfatı sahəsinin əmək tutumlu sahə olduğunu deyən M. Abbasbəyli aqrar sektorda belə layihələrin davamlı icrasının zəruri olduğunu söyləyib.
Təmsil etdiyi qurumun “AMAL” layihəsinə dəstək verməkdə maraqlı olduğunu deyən Gənclər Fondunun icraçı direktoru Fərid Cəfərov bu layihənin regionlarda icrasının genişləndirilməsinin vacibliyinə diqqət çəkib.
BMT-nin Ərzaq və Kənd Təsərrüfatı Təşkilatı (FAO) ilə Azərbaycan hökuməti arasında Tərəfdaşlıq Proqramının (FATP) idarəetmə mütəxəssisi Namiq Məmmədov “AMAL” layihəsi çərçivəsində görülən işlərə toxunub, layihənin nəticələri barədə təqdimatla çıxış edib.
Görüş panel müzakirələrlə davam etdirilib.
Tədbirdə müxtəlif dövlət qurumlarının rəhbər şəxsləri və nümayəndələri iştirak ediblər.