Bakı, 28 iyul (AZƏRTAC). İyulun 28-də ARDNŞ rəhbərliyi Şirkətin dəvəti ilə Bakıda səfərdə olan ABŞ-ın Missisipi ştatının qanunverici orqanlarının üzvlərindən ibarət nümayəndə heyətini qəbul etmişdir.

AZƏRTAC xəbər verir ki, qonaqları səmimi salamlayan ARDNŞ-in birinci vitse-prezidenti, akademik Xoşbəxt Yusifzadə son illər sürətli inkişaf tempi ilə dünyanın diqqətini cəlb edən Azərbaycan Respublikasının iqtisadi yüksəlişindən və bu yüksəlişdə ölkənin neft-qaz sənayesinin rolundan danışmışdır. O, qeyd etmişdir ki, Azərbaycan iqtisadiyyatının flaqmanı olan Dövlət Neft Şirkətini Amerikanın nüfuzlu neft-qaz şirkətləri ilə çoxillik səmərəli əməkdaşlıq əlaqələri bağlayır.

X.Yusifzadə Azərbaycanda neftçıxarma işinin zəngin tarixə malik olduğunu, Bakı neftçilərinin dünya neft sənayesinə çoxsaylı töhfələr verdiklərini söyləmiş, hələ Sovet dövründə onlar tərəfindən Xəzər dənizinin müxtəlif milli sektorlarında yerləşən böyük neft-qaz yataqlarının kəşf olunduğunu, keçmiş SSRİ-nin bir çox yerlərində neft sənayesinin əsası qoyulduğunu diqqətə çatdırmışdır.

Bildirilmişdir ki, əsası Ulu öndər Heydər Əliyev tərəfindən qoyulmuş və hazırda Azərbaycan Respublikasının Prezidenti İlham Əliyev cənabları tərəfindən uğurla davam etdirilən neft strategiyası çərçivəsində regional əhəmiyyətli layihələrin gerçəkləşdirilməsi, Azərbaycanda hasil olunan karbohidrogenlərin dünya bazarlarına çıxarılması məqsədi ilə qısa müddətdə şaxələndirilmiş neft və qaz kəmərlər sisteminin yaradılması barədə genmiş məlumat vermişdir.

Azərbaycana dəvət olunduqları və yüksək səviyyədə keçirilən görüş üçün ARDNŞ rəhbərliyinə təşəkkürünü bildirən Missisipi ştat senatoru Hillman Freyzer Azərbaycan ilə Amerika arasındakı dostluq və strateji münasibətlərdən danışmış, bu münasibətlərin son dövrdə daha da inkişaf etdiyini vurğulamışdır. Xalqlarımızın bir-birini daha yaxından tanımaları üçün belə səfərlərin əhəmiyyətini vurğulayan H.Freyzer Missisipi ştatının qanunverici orqanlarının üzvlərindən ibarət nümayəndə heyətini ARDNŞ rəhbərliyinə təqdim etmiş, bildirmişdir ki, bu ştatla Azərbaycan arasında münasibətlər daha sıx və genişdir. Ştatın coğrafi, iqtisadi, sosial və mədəni göstəriciləri haqqında ətraflı məlumat verən qonaq ARDNŞ rəhbərliyini Missisipiyə dəvət etmişdir.

Görüşdə nümayəndə heyətinin üzvlərini maraqlandıran suallar cavablandırılmış, Missisipi ştatının konqresmen və senatorlarının bir sıra mühüm görüşlər keçirəcəkləri qeyd olunmuşdur. Sonda qonaqlar və ARDNŞ rəhbərliyi bir-birilərinə xatirə suvenirləri təqdim etmişlər.