AVROPA PARLAMENTİNƏ SEÇKİLƏR BAŞA ÇATMIŞDIR
Avropa Birliyinin üzvü olan 25 dövlətin ərazilərində çoxpartiyalı sistemlə seçkilər keçirilmiş, ölkələr Avropa Parlamentinə mandatlarını müəyyənləşdirmişlər.
AZƏRTAC-ın Almaniyadakı xüsusi müxbiri Avropa Birliyi Parlamentinin seçkilər barədə ümumiləşdirmələrinə istinadla xəbər verir ki, səsvermənin nəticələrinə görə, AB üzvü 25 ölkənin mühafizəkar partiyalarını gələcəkdə Avropa Parlamentində birləşdirəcək Avropa Xalq Partiyası (AXP) parlamentdəki 732 deputat yerindən - 269 mandatın sahibi olacaqdır. Sosial-demokratlar bloku 199, liberallar 66, yaşıllar 39, Birləşmiş Sollar Qrupu - 37, Avropa Millətləri Birliyi 26, Avropaya Demokratiya Birliyi 20 mandat əldə etmişdir.
Almaniyada da Avropa Parlamentinə seçkilər sensasiya ilə nəticələnmişdir. Seçkilərdə səsvermə hüququ olan əhalinin 40,5 faizi iştirak etmişdir. İqtidar - müxalifət – “Qırmızı-yaşıllar” və Xristian Demokratlar-Azad Demokratlar koalisiyalarının mübarizəsi şəraitində keçən seçki marafonu XDİ/XSİ-nin qələbəsi ilə nəticələnmişdir. Almaniya Avropa Parlamentində 88 mandatla təmsil olunacaqdır.
Bölmənin digər xəbərləri
