AVSTRİYADA „ƏSRİN PROSESİ“ BAŞLAMIŞDIR
Aşağı Avstriya federal əyalətinin mərkəzi Sankt Pölten şəhərində öz qızını 24 il zirzəmidə saxlayan və ona qarşı cinsi zorakılıq tətbiq edən 74 yaşlı Yozef Fritslə qarşı məhkəmə prosesi başlamışdır.
Xatırladaq ki, ötən ilin may ayında Avstriyanın Amştetten şəhərinin sakini Yozef Fritslin doğma qızı Elzabet Fritsli 24 il zirzəmidə saxlaması, ondan 7 uşaq dünyaya gətirməsi faktı aşkarlanmışdı. Yerli əhali arasında səmimi təsir bağışlayan və heç zaman insanlarda öz dəhşətli cinayətlərinə görə şübhə oyatmayan Y.Fritsl fakt aşkarlandıqdan sonra həbsə alınmışdır.
Y.Fritsl adam öldürmə, zorlama, qul kimi saxlama, insanın azadlığını əlindən alma və s. cinayətlərində təqsirkar bilinir. Onun vəkili, Avstriyanın ən tanınmış hüquqşünaslarından olan Rudolf Mayer adam öldürmə və qul kimi saxlama ittihamlarını rədd etsə də, digər hallara görə cinayət əməllərini etiraf edəcəyini bildirmişdir. Qul kimi saxlamaya dair maddə Avstriya Cinayət Məcəlləsində öz əksini tapsa da, ölkə tarixində ilk dəfə olaraq həmin maddə ilə ittiham aktı tərtib olunur. Yuxarıda sadalanan cinayətlərə görə müttəhimi ömürlük həbs cəzası gözləyir.
Ciddi polis nəzarəti altında keçirilən məhkəmə prosesi dünyanın çox yerindən kütləvi informasiya vasitələrinin diqqət mərkəzindədir. Təkcə 35 telekanalın çəkiliş heyəti və 200-dən artıq jurnalist məhkəmənin keçirildiyi Aşağı Avstriya Əyalət Məhkəməsinin önündə mövqe tutaraq, prosesin gedişatını mətbuatda işıqlandırırlar. Cinayət qurbanlarını qorumaq və onların sərbəst ifadə verməsini təmin etmək məqsədi ilə məhkəmə iclasının mətbuat üçün qapalı keçirilməsi qərara alınmışdır. Eyni zamanda, icazəsiz hava çəkilişlərinə şərait yaratmamaq məqsədi ilə məhkəmə binasının üzərində 2 kilometr radiusda uçuş qadağası tətbiq edilir. Yalnız dövlət ittihamçısı tərəfindən ittiham səsləndirilərkən mətbuat nümayəndələrinin iclas zalında iştirak etməsinə icazə verilmişdir. Yozef Fritsl həmin müddət ərzində üzünü kağız qovluğu ilə örtülü saxlamışdır.
Cinayətin qurbanları - Elizabet və onun uşaqlarının ilkin ifadələrinin videoyazısı məhkəmədə nümayiş etdiriləcək və ciddi ehtiyac yaranmazsa, imkan daxilində onların Y.Fritsl ilə üz-üzə gəlməsinə şərait yaradılmayacaqdır.
Məhkəmə prosesinin martın 20-də yekunlaşacağı gözlənilir.
Qeyd edək ki, bu dəhşətli cinayətin üstünün açılması Avstriyanın beynəlxalq imicinə böyük zərər vurmuşdur. Xatırladaq ki, 2006-cı ilin avqust ayında 8 il zirzəmidə dustaq saxlanılan 18 yaşlı Nataşa Kampuş öz gücünə xilas olduqdan sonra, ölkədə ikinci oxşar halın cəmi iki il ötəndən sonra baş verməsi bir sual doğurur: görəsən daha nə qədər zavallı hələ də zirzəmilərdə saxlanılır?
Elgün Niftəliyev
AZƏRTAC-ın xüsusi müxbiri
Vyana
Bölmənin digər xəbərləri
