AVTOMOBİL FIRILDAĞI
Berlin, 6 avqust (AZƏRTAC). Almaniyada köhnə avtomobilini metal qırıntısı toplayan bazaya təhvil verərək, yeni maşın alanlara dövlət mükafatı verilməsi ilə bağlı avtomobil dilerlərinin kütləvi fırıldaq törətmələri aşkar edilmişdir. “Bild” qəzetinin yazdığına görə, bəzi natəmiz işbazlar təhvil verilən köhnə maşınları utilləşdirmək əvəzinə, onları Şərqi Avropa və Afrika ölkələrinə satırmışlar. Polisin hesablamalarına görə, onlar 50 minə yaxın belə maşın satmışlar. Bu, metal qırıntısı bazasına rəsmi təhvil verilmiş köhnə avtomobillərin 5-10 faizini təşkil edir.
Xatırladaq ki, AFR-da bu ilin axırınadək belə bir qayda qüvvədədir ki, 9 ildən çox istifadə etdiyi maşınını metal qırıntısı bazasına təhvil verən şəxsə yeni avtomobil aldığı zaman 2500 avro məbləğində dövlət mükafatı verilir. Avtomobil bazarını stimullaşdırmağa xidmət edən bu proqramdan Almaniyanın artıq yarım milyona qədər sakini istifadə etmişdir. Polis bildirmişdir ki, dövlət mükafatı hesabına varlanmış avtomobil ticarətçilərinin bütöv bir mütəşəkkil şəbəkəsi aşkar edilmişdir. Polis, həmçinin narazılığını bildirmişdir ki, qeyri-müəyyən hüquqi vəziyyət avtomobil fırıldaqçılarını məsuliyyətə cəlb etməyə imkan vermir.
Vüqar Seyidov
AZƏRTAC-ın xüsusi müxbiri
Berlin
Bölmənin digər xəbərləri
