İQTİSADİYYAT
“Avtomobillə yük daşıyıcılarının mülki məsuliyyəti” sığorta məhsulu yaxın vaxtlarda təqdim olunacaq
Bakı, 18 mart, AZƏRTAC
“Azərpoçt” MMC, “Atəşgah” sığorta şirkəti, “AzRe Təkrarsığorta” şirkəti, Azərbaycan və Beynəlxalq Avtomobil Daşıyıcıları Assosiasiyasının (ABADA) rəhbər heyətlərinin görüşü keçirilib. Görüşdə yeni yaradılan “Avtomobillə yük daşıyıcılarının mülki məsuliyyəti” sığorta məhsulu və digər əməkdaşlıq imkanları müzakirə olunub.
MMC-dən AZƏRTAC-a bildirilib ki, yeni sığorta məhsulunun yaxın vaxtlarda müştərilərin istifadəsinə verilməsi planlaşdırılır. Bu sığorta məhsulu quru yolu ilə həyata keçirilən beynəlxalq daşımalara şamil edilir. Transport zamanı yükün itməsinə, məhv olmasına, yaxud korlanmasına görə sığortalı daşıyıcının yükgöndərən və ya alıcı qarşısında olan mülki məsuliyyətini sığorta təminatı altına alır. Sığorta təminatı daşıyıcının yükü yükgöndərəndən təhvil aldığı zamandan qüvvəyə minir, alıcıya təhvil verdikdən sonra qüvvədən düşür.
Sığortalılar əlavə sığorta haqqı ödəməklə digər mülki məsuliyyətlərə görə də təminatlar əldə edə bilərlər: Yükün yanlış ünvana çatdırılması nəticəsində yaranmış maddi ziyana görə mülki məsuliyyət; Yükün daşınması zamanı daşınan yükün/konteynerin səbəb olduğu üçüncü şəxslərin həyatına, sağlamlığına, əmlakına, o cümlədən ətraf mühitə dəymiş ziyana görə mülki məsuliyyət.
Xidmətin əlçatanlığının təmin olunması və prosesin asanlaşdırılması məqsədilə “Azərpoçt” MMC bu sığorta paketinin bütün nəzarət-keçid məntəqələrində təqdim olunmasını təşkil edir. TIR sürücüləri və sahibkarlar uzağa getmədən, gömrük-sərhəd buraxılışlarında yerləşən “Azərpoçt” məntəqələrində və digər “Azərpoçt” şöbələrində “Avtomobillə yük daşıyıcılarının mülki məsuliyyəti” sığorta xidmətindən faydalana bilərlər.
Maraqlananlar şəxslərdən ətraflı məlumat üçün “940” Çağrı mərkəzinə müraciət etmələri xahiş olunur.