Rektor: Prezident İlham Əliyevin uzaqgörən strateji fəaliyyəti cəmi 44 gün ərzində ölkəmizin ərazi bütövlüyünün təmin edilməsi ilə nəticələndi

Bakı, 28 oktyabr, AZƏRTAC

2003-cü il oktyabrın 15-də ilk dəfə Azərbaycan Respublikasının Prezidenti seçilən İlham Əliyevin andiçmə mərasimindəki nitqi Azərbaycanın yeni dövrdəki inkişaf yolunun aydın strategiyasını müəyyən etdi. Ulu Öndər Heydər Əliyevin əsasını qoyduğu Azərbaycanın sülh, əmin-amanlıq, tərəqqi, inkişaf, quruculuq və sabitlik yolu ilə inkişafını davam etdirəcəyini bildirən İlham Əliyevin 20 il öncə andiçmə mərasimində verdiyi bəyanatın hər bir müddəası növbəti illərdə dövlət siyasəti kimi yüksək səviyyədə icra olundu.

Bu fikirləri AZƏRTAC-a açıqlamasında Bakı Slavyan Universitetinin rektoru Anar Nağıyev bildirib. O qeyd edib ki, Prezident İlham Əliyevin rəhbərliyi altında Azərbaycanın iqtisadi inkişafı müasir dünyanın tələbləri əsasında təmin olundu, ölkənin iqtisadi potensialı insan kapitalının mərkəzi hədəfi olaraq inkişaf etdi. Aparılan uğurlu fəaliyyətin nəticəsi olaraq Azərbaycan bir çox beynəlxalq hesabat və reytinqlərdə insan kapitalının inkişafı, səmərəli biznes mühitinin mövcudluğu və rəqabətədavamlı iş mühitinin formalaşdığı ölkələr sırasına yüksəldi. Dünya Bankının insan kapitalı indeksi, eləcə də insan inkişafı indeksi, qlobal rəqabətədavamlılıq indeksi və bu kimi beynəlxalq sıralamalarda Azərbaycanın göstəriciləri daim yüksəlməkdədir.

Rektor vurğulayıb ki, ölkəmizin ərazi bütövlüyü təmin olunduqdan sonra 2030-cu ilədək sosial-iqtisadi inkişafımız üçün müəyyən edilmiş milli prioritetlərin hər biri insan kapitalının və sosial rifahın inkişafına xidmət edir. Prezident İlham Əliyevin uzaqgörən siyasəti nəticəsində iqtisadi inkişaf innovativ həllər vasitəsilə daha da optimallaşdırılır, müxtəlif dövlət proqramları tətbiq edilir. Ölkəni rəqabətdə irəli aparmaq üçün cəmiyyətin yaradıcılığını və innovativliyini stimullaşdıran ekosistem qurulması mühüm hədəf kimi müəyyən edilib. Göstərilən məqsədlərə nail olmaq üçün Azərbaycan XXI əsrin tələblərinə uyğun təhsil siyasətinin həyata keçirilməsi ilə keyfiyyətli insan kapitalını daha da gücləndirməyi hədəfləyir. Bu dövr ərzində təhsilin pillə və səviyyələri üzrə inkişafı və onun əlçatanlığı, eləcə də elmin və elmi-tədqiqat potensialının müasirləşdirilməsi istiqamətində əsaslı işlər görülüb, ölkədə təhsilin bütün pillə və səviyyələri üzrə infrastruktur və məzmun islahatları həyata keçirilib, ali təhsilli vətəndaşların sayının artırılması və peşə təhsilinin əhatəsinin genişləndirilməsi məqsədilə davamlı islahatlar aparılıb. Minlərlə Azərbaycan gənci dünyanın ən nüfuzlu universitetlərində təhsil almaq imkanı qazanıb.

Ötən iyirmi il ərzində ölkəmizin beynəlxalq münasibətlər sisteminə uğurlu inteqrasiya etdiyini və Azərbaycanın etibarlı tərəfdaş statusu qazandığını vurğulayan rektor bildirib ki, 2013-cü ildə ölkəmiz BMT-nın Təhlükəsizlik Şurasına sədrlik edib, bu fəaliyyəti çərçivəsində terrorizm və təhlükəsizliyə qarşı qlobal mübarizənin gücləndirilməsi üçün çalışıb, BMT tarixində ilk dəfə olaraq BMT ilə İslam Əməkdaşlıq Təşkilatı arasında tərəfdaşlıq əlaqələrinin gücləndirilməsinə çalışıb. Prezident İlham Əliyevin dünyanın ən böyük beynəlxalq təşkilatı olan Qoşulmama Hərəkatına (QH) rəhbərliyi Azərbaycanın nüfuzunun artmasının növbəti bariz nümunəsidir. Məhz Azərbaycanın dövlət başçısının təşəbbüsü və rəhbərliyi ilə 2020-ci ildə QH-də COVID-19 pandemiyasına dair iclas keçirilib, işçi qrupu yaradılıb və Prezident İlham Əliyevin təşəbbüsü ilə BMT Baş Assambleyasının COVID-19-a qarşı mübarizəsinin aparılması məqsədilə xüsusi sessiyası keçirilib. Beləliklə, Azərbaycan yalnız Cənubi Qafqaz regionu və ətraf coğrafiyada deyil, qlobal məsələlərin həllində də aparıcı rol oynamaqdadır. Azərbaycan yerləşdiyimiz regionun kommunikasiya infrastrukturunun qurulmasında, habelə Avropanın enerji təhlükəsizliyinin təmin olunmasında mühüm rol oynayır. Bununla yanaşı, Prezident İlham Əliyevin türk dövlətlərinin inteqrasiyasına yönəlin fəaliyyəti xüsusi qeyd edilməlidir. Belə ki, 2009-cu ildə Azərbaycanda başlayan prosesin tədricən bütün türkdilli dövlətləri əhatə etməsi işində Prezident İlham Əliyevin davamlı və sistemli siyasəti müstəsna rol oynayıb.

Rektor vurğulayıb ki, müstəqilliyimizin bərpasının ilk illərində formalaşmış mürəkkəb geosiyasi və geoiqtisadi şəraitdə Ulu Öndər Heydər Əliyev müasir Azərbaycan dövlətini qurdu. Prezident İlham Əliyev isə bu dövləti yeni zirvələrə yüksəltdi. Prezident İlham Əliyevin uzaqgörən strateji fəaliyyəti 2020-ci ilin payızında cəmi 44 gün ərzində ölkəmizin ərazi bütövlüyünün təmin edilməsi ilə nəticələndi. Məhz Prezident İlham Əliyevin uzaqgörən siyasəti, xalqa olan sevgisi və xalqdan davamlı olaraq aldığı dəstək bu tarixi missiyaya imza atmağa imkan verdi. Ölkəmizin ərazi bütövlüyünün təmin edilməsi tarixi ədalətin təntənəsi ilə yanaşı, həm də beynəlxalq hüququn norma və prinsiplərinin təmin olunması, BMT-nin qətnamələrinin yerinə yetirilməsi demək idi. Suverenliyimizin tam təmin edilməsi ilə nəticələnən 2023-cü ilin sentyabr ayının lokal antiterror tədbirləri beynəlxalq humanitar hüquq və Azərbaycan qanunvericiliyinin tələblərinə uyğun şəkildə həyata keçirilməklə, ölkəmizin son iyirmi ildə formalaşdırdığı ədalətli dövlətçilik ənənələrini bir daha nümayiş etdirdi.

“Güclü lider, milli birlik və qüdrətli iqtisadi inkişaf nəticəsində əldə edilmiş qələbə ölkəmizdə innovasiyanın hər bir sahədə tətbiq olunduğunu nümayiş etdirməklə yanaşı, Azərbaycanın beynəlxalq humanitar hüququn prinsiplərinə, ədalət və ləyaqət anlayışına hörmətinin növbəti təzahürü oldu. Prezident İlham Əliyevin dəfələrlə qeyd etdiyi kimi, öz ərazi bütövlüyü və suverenliyinin bərpasında Azərbaycan dövləti beynəlxalq hüququn, Cenevrə konvensiyalarının bütün tələblərinə əməl edərək düşmənə qarşı ləyaqətlə davrandı. Bu isə həm beynəlxalq humanitar hüquq konteksti, həm də müvafiq situasiyalar üçün ədalətli idarəetmənin nümunəsini yaradır, siyasi elmin nəzəriyyələri çərçivəsində mühüm tədqiqatlara yol açır. Bu, bütün sahələrdə ədalət prinsiplərinə söykənın idarəetmə modelinin tətbiqinin aydın nümunəsidir”, - deyə A.Nağıyev bildirib.

Rektor vurğulayıb ki, Ulu Öndər Heydər Əliyevin anadan olmasının 100 illiyinin qeyd olunduğu 2023-cü ildə ölkəmizin tam suverenliyinin bərpa edilməsi fərəhləndirici və qürurverici haldır. İlk dəfə prezident seçilməsinin iyirminci ilinin tamamında, 2023-cü ilin 15 oktyabrında Prezident İlham Əliyevin Xankəndi, Xocalı, Xocavənd, Ağdərə şəhərlərində, digər qəsəbə və ərazilərimizdə Azərbaycanın Dövlət Bayrağını ucaltması, Xankəndi şəhərindən xalqa müraciəti tariximizin yeni inkişaf salnaməsinə keçidi xarakterizə edir.

“Prezident İlham Əliyevin Xankəndi şəhərindən xalqa müraciəti Azərbaycan xalqının 30 illik işğal və təcavüz yarasını sildi, qarşımızda yeni inkişaf hədəfləri qoydu. Prezident İlham Əliyev xalqın milli kimliyini özünə qaytararaq onu uzun əsrlərin mənfi basqılarından xilas etdi, əsrlər boyu ərazi və suverenlik itkisi ilə sarsılan milli şüurunda yeni bir dönəmi, qalibiyyətlər və yüksəliş erasını başlatdı. Prezident İlham Əliyevin rəhbərliyi altında Azərbaycanın bundan sonrakı inkişafı da ölkəmizin yeni zirvələrə yüksəlişləri ilə müşayiət olunacaq. Azərbaycan XXI əsrin sürətlə inkişaf edən innovasiyalar məkanına çevirəcək”, - deyə A.Nağıyev fikrini yekunlaşdırıb.