Bakı, 27 iyun, AZƏRTAC 

Azərbaycan ASAN Beynəlxalq Assosiasiyası çərçivəsində dövlət-özəl tərəfdaşlığı layihələrinin qlobal reyestrinin yaradılmasının təşəbbüskarı ola bilər.

Bu barədə AZƏRTAC-a Azərbaycan İnnovasiyaların İxracı Konsorsiumunun Müşahidə Şurasının sədri və “SINAM” şirkətinin prezidenti Elçin Əliyev məlumat verib. O, bildirib ki, BMT-nin Dövlət Xidmətləri Forumu çərçivəsində yaradılan Assosiasiyaya Azərbaycan, Mərakeş, Monteneqro, İndoneziya, Əfqanıstan, Türkiyə, Uqanda və BƏƏ qoşulub.

Onun sözlərinə görə, belə reyestrin yaradılması dünyanın istənilən hissəsində yerləşən ölkələrə dövlət-özəl tərəfdaşlığı əsasında yaradılıb uğurla tətbiq edilən layihələri yaxından öyrənməyə şərait yaradacaq: “Faktiki olaraq hər bir hökumət dövlət-özəl tərəfdaşlığı çərçivəsində olan layihələrin tətbiqinin üstünlükləri, istifadə edilən texnologiya haqqında məlumat və digər ölkələrin bu istiqamətdə uğurları ilə yaxından tanış olacaq. Azərbaycanın bu reyestrdə yetərincə təmsil olunacağı şübhəsizdir. Çünki ölkədə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və digər dövlət qurumlarının iştirakı ilə dövlət-özəl tərəfdaşlığı modeli çərçivəsində müxtəlif mürəkkəb layihələr həyata keçirilib. Dövlət-özəl tərəfdaşlığı modeli çərçivəsində reallaşdırılan uğurlu layihələrə “ASAN Viza”, Elektron Sənəd Dövriyyəsi, Büdcə Təşkilatlarının Resurslarının İdarə Edilməsi Sistemi (SERP), elektron imza, “AzNav” Milli Naviqasiya Sistemini və s. aid etmək olar”.

E.Əliyev hesab edir ki, misal üçün bu reyestrdə “ASAN Viza” elektron viza qeydiyyatı sistemi layihəsinin yerləşdirilməsi, bütün ölkələrə sistemin texnoloji üstünlükləri və turizm sektoruna müsbət təsiri ilə yaxından tanış olmağa imkan verəcək. Bu layihənin ölkəmizdə uğuru ilə tanış olandan sonra ölkələr elektron viza qeydiyyatı sisteminin tətbiqi üçün Azərbaycana müraciət edə bilərlər. Çünki “ASAN Viza” bir neçə ildir ki, uğurla tətbiq olunur və beynəlxalq səviyyədə yüksək qiymətləndirilib.

Qeyd etmək lazımdır ki, dövlət-özəl tərəfdaşlığı modeli çərçivəsində dövlət təşkilatları və özəl biznes hər-hansı bir dövlət xidmətinin yaradılmasında tərəfdaş kimi çıxış edir. Bu model çərçivəsində biznes xidmətin yaradılması və dəstəyini öz üzərinə götürür və büdcə vəsaitlərinin qənaəti təmin olunur. Özəl sektor tərəfindən qoyulan investisiyalar xidmətin istifadəsi mərhələsində geri qaytarılır.